ᚦ
From Wikipedia, the free encyclopedia
þurisaz oder þurnaz (ᚦ) sind di erschlossne urgermanische Näme vo de th/þ-Ruune. Er lutet uf Altnordisch þurs, Altdänisch ᚦᚼᚢᚱᛋ dhurs; Altenglisch þorn und im Hrabanische Alphabet dorn. D Bidütig isch "Thurs, Riis" oder "Dorn". Im Mittelalter het mer z Skandinavie die Ruune au miteme Punkt gschribe, um de stimmhafti Frikativ /ð/ z schriibe. De gotisch Buechstabe "þ" (𐌸) haisst degege thiuth "Guets" und d Form entsprecht em griechische Buechstabe Phi (Φ).
De Buechstaabe isch im Altenglisch und Mittelenglische no lang bruucht worde, denn aber dur d Schriibig "th" ersetz worde (ae. þorn; me. þorn, thorn; ne. thorn »Dorn«). Im Isländische werd de Buechstabe (grooss: Þ, chlii: þ: þorn /θotn̥/) no hüt bruucht.
D th/þ-Ruune isch die dritt Ruune i allne öberlifrete Ruunealphabet und die dritt Ruune vom Freys ætt.