Bantustán
From Wikipedia, the free encyclopedia
Bantustán ye'l términu que designa cada unu de los venti territorios qu'operaron como reserves tribales d'habitantes non blancos en Sudáfrica y África del Suroeste (actual Namibia), nel marcu de les polítiques segregacionistes impuestes mientres la dómina del apartheid. Tanto na República Sudafricana como nel territoriu aledaño d'África del Suroeste (daquella, sol so ocupación y alministración), estableciéronse diez reserves d'esta clase, destinaes a agospiar y concentrar na so interior poblaciones étnicamente homoxénees.
Dende los entamos, en 1959, de la implementación llegal del conceutu, hasta'l so esmantelamientu final en 1994, dellos bantustanes recibieron independencia nominal (Transkei, Vienda, Bofutatsuana y Ciskei, en Sudáfrica; Ovamboland, Kavangoland y Caprivi del Este, n'África del Suroeste); otros (como KwaZulu, Lebowa y QwaQwa) permanecieron nuna condición de relativa autonomía alministrativa, pero nunca fueron declaraos independientes. Sicasí, a nengún d'ellos foi-y reconocida internacionalmente la condición de nación soberana; solo fueron almitíos nesos términos pola mesma Sudáfrica y, recíprocamente, ente ellos mesmos.
La pallabra «bantustán» empezó a utilizase en 1940; tien el so orixe en bantú (que significa «xente» na llingua bantú) y nel sufixu -stan («tierra de», en llinguaxe persa, en forma similar a la terminación -land d'orixe xermánicu). Yera un términu usáu polos críticos de los gobiernos del apartheid, n'oposición a la espresión homelands («patries»), que yera la promovida pol discursu oficial pa designar el mesmu fenómenu.
Na actualidá, el términu «bantustán» emplégase de cutiu con intención peyorativa, cuando pretende aludise a un país o rexón carente de llexitimidá, que remanez productu d'un procesu de gerrymandering. El términu volvió algamar gran espardimientu, apaeciendo sobremanera en forma extrapolada; por casu, en discursos críticos a les polítiques israelíes para colos Territorios Palestinos de la Franxa de Gaza y de Cixordania y, particularmente, en rellación a la barrera israelina de Cixordania, llamada polos sos detractores muriu del apartheid» o «muro de la vergüenza».