Declaración d'Independencia de Kosovu
From Wikipedia, the free encyclopedia
La Declaración d'independencia de Kosovu foi un actu socedíu'l 17 de febreru de 2008 y lleváu a cabu pol Parllamentu kosovar de forma unillateral, que declaraba la dixebra d'esti territoriu de mayoría albanesa del restu de Serbia, dando llugar a la creación d'un nuevu Estáu, denomináu oficialmente República de Kosovu, so la supervisión d'Estaos Xuníos y la Xunión Europea. Trátase de la segunda declaración d'independencia na hestoria recién del territoriu kosovar, una y bones el 7 de setiembre de 1990 les instituciones polítiques kosovares de mayoría albanesa proclamaron la so independencia al respective de Yugoslavia, anque esta declaración nun llegó a tener efeutu práuticu.
Deklarata e Pavarësisë së Kosovës | |
---|---|
Tipu | Declaración d'independencia y autoproclamado (es) |
Estáu | Kosovu |
Llingua orixinal | albanés |
Tema | Kosovo's independence (en) |
Llocalización | Prístina |
Creación | 2008 |
Publicación | 17 febreru 2008 |
Robláu por | Hashim Thaçi, Jakup Krasniqi y Fatmir Sejdiu |
La declaración d'independencia estremó a los estaos ente aquellos que la sofitaron, como Estaos Xuníos, los sos principales aliaos y parte de la Xunión Europea; y aquellos que s'opunxeron como la mesma Serbia, Rusia y los sos aliaos, y estaos como España y gran parte de Llatinoamérica, que s'amosaron contrarios a la reconocencia de la provincia serbia como Estáu independiente.
El 8 d'ochobre de 2008 l'Asamblea Xeneral de Naciones Xuníes aprobó una resolución a propuesta serbia pa preguntar a la Corte Internacional de Xusticia si la Declaración d'independencia de Kosovu foi compatible col derechu internacional,[1] y el 22 de xunetu de 2010 el tribunal comunicó la so conclusión de que la declaración d'independencia nun violó'l derechu internacional nin la Resolución 1244 del Conseyu de Seguridá de les Naciones Xuníes.[2]