Bawang
From Wikipedia, the free encyclopedia
An bawang (Allium sativum; Ing. garlic) sarong klaseng tinanom na panrekado na nagtataong namit sa pigluluto. Kun sa klasipikasyon, sarong species ini na yaon sa pamilyang sibulyas na inapod Alliaceae. Haraning kapinsanan kaini iyo an sibulyas mismo. Sa lawig nin panahon, dati na ining ginagamit sa pagluto asin sa pagbulong. May namit ining maharang-harang, nangangagat o maramismis asin may makusog na parong. Ini nagkakabaraak-baak sa mga magkapirang butil. An mga butl ginagamit bilang pisog, pagkakan (hilaw man o bako), o komo panbulong. Kinakakan man an mga dahon, mga sanga-sanga o paklang, asin burak kaini, orog na kun lombod asin ogbos pa. An mga mahimpis na ubak asin gamotgamot kan bunga nin bawang an dai lang kinakakan. An maisog na parong kaini naghahale sa dara niyang kompound na asupre.