Арганічная хімія
разьдзел хіміі, які займаецца вывучэньнем злучэньняў вугляроду / From Wikipedia, the free encyclopedia
Арганічная хімія — галіна хіміі, якая вывучае пабудову, фізычныя і хімічныя ўласьцівасьці, рэакцыі і стварэньне (сынтэзам ці іншымі шляхамі) вугляродазьмяшчальных злучэньняў, вуглевадародаў і іх вытворных. Гэтыя злучэньні могуць утрымліваць вялікую колькасьць розных элемэнтаў, у прыватнасьці вадарод, тлен, азот, галягены і гэтак далей.
Пабудова арганічных злучэньняў вельмі разнастайная, адпаведна і разнастайныя ўласьцівасьці арганічных злучэньняў, што робіць магчымым іх выкарыстаньне практычна ў любой галіне дзейнасьці чалавека. Яны закладаюць аснову, ці самі зьяўляюцца складнікамі вялікай колькасьці рэчаў: ежа, плястмасы, лекі, нафтахімія і шмат іншага. Гэтыя злучэньні таксама зьяўляюцца асновай усіх біяпрацэсаў на Зямлі.
Арганічная хімія, як і ўсе навукі, разьвіваецца разам з патрэбамі часу. Дасягненьні ад дасьледаваньняў у арганічнай хіміі даюць плён ва ўсіх сфэрах гаспадарчай дзейнасьці: біяхіміі, фармацыі, стварэньні і выкарыстаньні арганічных угнаеньняў.