Milčenjo
słowjanski kmjen w Hornjej Łužicy / From Wikipedia, the free encyclopedia
Milčenjo (delnjoserbsce: Milcany, čěsce Milčané; němsce Milzener; pólsce Milczanie) běchu zapadosłowjanski kmjen w Hornjej Łužicy, kotryž naspomni so prěni raz we wopisanju bayerskeho geografa srjedź 9. lětstotka. Tutón připisuje Milčanam hižo 30 sydlišćow (civitates), snano hižo z centralnym hrodźišćom srjedź přisłušnych sydlišćow.
Dokładne wotmjezowanje sydlenskeho teritorija Milčanow je w slědźenju dwělomne. Wono wobsahowa hłownje krajinu z płódnymi hlininowymi pódami a z rozměrom něhdźe 50 kilometrow wot wuchoda do zapada a něhdźe 20 kilometrow wot sewjera do juha. Sewjernu hranicu drje tworješe bahnojta a zdźěla njepłódna nižina a južnu hranicu tworjachu Łužiske horiny. W zapadźe tworja Porchowske hory zapadnje Kamjenca přirodny ryhel. Na wuchod, k susodnemu teritorijej Bjezunčanow, je wotmjezowanje mjenje jasne. Kmjenowy centrum bě centralny hród w Budyšinje. Po Milčanach mjenowaše so region wokoło Budyšina w pisomnych žórłach 10. do 12. lětstotka Gau Milsca. Hišće dźensa bydla w regionje słowjanscy Serbja, potomnicy Milčanow.
Towarstwo Die Milzener e.V. z Měrjowa zaběra so z kulturu a tradicijemi pohanskich Milčanow.