![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/a/a7/Classical_7-Circuit_Labyrinth.svg/langhy-640px-Classical_7-Circuit_Labyrinth.svg.png&w=640&q=50)
Լաբիրինթոս
From Wikipedia, the free encyclopedia
Լաբիրինթոս (հին հունարեն՝ λαβύρινθος), բազմաթիվ, խճճված միջանցքներով բարդ կառույց։ Հույն և հռոմեացի հեղինակները (Հերոդոտոս, Դիոդորոս, Պլինիոս, Ստրաբոն և ուրիշներ) հիշատակում են մի քանի լաբիրինթոսներ։ Կրետե կղզու լաբիրինթոսը (նույնացվում է Կնոսոսի հռչակավոր պալատին), ըստ ավանդազրույցի, Մինոս թագավորի հրամանով Մինոտավրոս հրեշի համար կառուցել է Դեդալոսը։ Եգիպտոսի լաբիրինթոսը (Ֆայումի մոտ), որն ուներ շուրջ 2 հազար սենյակ, հավանորեն կառուցվել է Ամենեմհետ III փարավոնի ժամանակ (մ.թ.ա. XIX դ.)։ Սամոս կղզու լաբիրինթոսը (մ.թ.ա. VI դ.) կառուցել է Պոլիկրատոս միապետը։ Իտալիկյան լաբիրինթոսը (Կլուզիում քաղաքի մոտ) ենթադրում են, որ եղել է Ետրուրիայի Պորսենոս թագավորի (մ.թ.ա. VI դ.) դամբարանը։
Անվան այլ կիրառումների համար տե՛ս՝ Լաբիրինթոս (այլ կիրառումներ)
![Thumb image](http://upload.wikimedia.org/wikipedia/commons/thumb/a/a7/Classical_7-Circuit_Labyrinth.svg/640px-Classical_7-Circuit_Labyrinth.svg.png)
![Thumb image](http://upload.wikimedia.org/wikipedia/commons/thumb/9/90/Theseus_Minotaur_Mosaic.jpg/320px-Theseus_Minotaur_Mosaic.jpg)
![Thumb image](http://upload.wikimedia.org/wikipedia/commons/thumb/7/78/Labyrinth_1_%28from_Nordisk_familjebok%29.svg/640px-Labyrinth_1_%28from_Nordisk_familjebok%29.svg.png)
Լաբիրինթոս է կոչվում նաև գունավոր քարերից ձևավոր շարված հատակ։ Բնորոշ է գոթական ոճի հասուն շրջանին (XIII - XIV դդ.), հատկապես Ֆրանսիայի մի քանի տաճարներին (Շարտր, Ռեյմս, Ամիեն, Սենտ-Օմեր և այլն)։ Նման տիպի լաբիրինթոսներ չեն պահպանվել, հայտնի են XVIII դ. հետազոտողների գծանկարներից (մասամբ պահպանվել է Շարտրի տաճարի լաբիրինթոսը)։
Փոխաբերական առումով «լաբիրինթոս» նշանակում է խառնակ, անելանելի վիճակ։