Շուկա
From Wikipedia, the free encyclopedia
Շուկա, փոխանակության ոլորտ, սոցիալ-տնտեսական հարաբերությունների ամբողջություն, որոնց միջոցով իրականացվում է ապրանքների իրացումն ու դրսևորվում դրանցում մարմնավորված աշխատանքի հասարակական բնույթը։ Շուկան տնտեսական ազատության վրա հիմնված համակարգ է, որը դրսևորվում է ազատ ձեռներեցությամբ, գնագոյացմամբ, մրցակցությամբ, տեղեկատվությամբ և այլնով։Շուկան մի կողմից հասարակական արտադրության կազմակերպման ձև է, մյուս կողմից մեխանիզմ է, որը թույլ է տալիս որոշել տարբեր ապրանքների ու ծառայությունների առաջարկի և պահանջարկի հարաբերությունները։ Շուկաներում գնորդների ու վաճառողների որոշումները առաջացնում են առաջարկը և պահանջարկը, իսկ այդ որոշումների արդյունքը ձևավորում է ապրանքների և ռեսուրսների գների համակարգը, որը ի մի է բերում բազմաթիվ անհատների կողմից ընդունված որոշումները։ Առավելագույն շահույթ ստանալու նպատակը հանգեցնում է մրցակցային պայքարի, որտեղ հաղթում են արտադրության և վաճառահանման առավել լավագույն պայմաններ ունեցող ապրանք արտադրողները, իսկ թույլերը դուրս են մղվում շուկայից։