അപ്പലൂസ
From Wikipedia, the free encyclopedia
നാനാവർണ്ണത്തിലുള്ള പുള്ളികളുള്ള കോട്ട് പാറ്റേണോട് കൂടിയ ഒരു സങ്കരയിനം അമേരിക്കൻ കുതിരയാണ് അപ്പലൂസ. കാലാകാലങ്ങളായി പലയിനം ബ്രീഡുകളിലുള്ള കുതിരകളുമായുള്ള നിരന്തരസങ്കരം മൂലം ഈ ബ്രീഡിൽ വ്യത്യസ്ത വലിപ്പത്തിലുള്ള കുതിരകൾ കാണപ്പെടുന്നു. ചില അടിസ്ഥാന കോട്ട് നിറങ്ങളുടെ മുകളിൽ പല വർണ്ണങ്ങളിലുള്ള പുള്ളികൾ പ്രത്യക്ഷപ്പെടുന്ന ജനിതകപ്രക്രിയയിലൂടെയാണ് ഇവയുടെ കോട്ട് പാറ്റേണുകൾ ഉണ്ടാകുന്നത്. ലെപേർഡ് കോംപ്ലക്സ് മ്യൂട്ടേഷനുകളുമായി വളരെ അടുത്തു ബന്ധപ്പെട്ടിരിയ്ക്കുന്നതിനാൽ അപ്പലൂസയുടെ കോട്ട് പാറ്റേണിന്റെയും മറ്റു പല ജൈവപ്രത്യേകതകളുടെയും ജനിതകത്തെക്കുറിച്ചുള്ള പഠനം ഇതിനെക്കുറിച്ചു വിശദമായി പഠിയ്ക്കുന്നവർക്ക് വളരെ താല്പര്യമുണ്ടാക്കുന്നതാണ്. അപ്പലൂസകൾക്ക് ഇക്വിൻ റിക്കറന്റ് യൂവൈറ്റിസ്, കൺജെനിറ്റൽ സ്റ്റേഷനറി നൈറ്റ്ബ്ലൈൻഡ്നെസ് (നിശാന്ധത) തുടങ്ങിയ നേത്രരോഗങ്ങൾ ബാധിയ്ക്കാൻ ഉയർന്ന സാധ്യതയുണ്ട്. ഇതിൽ നിശാന്ധത ലെപേർഡ് കോംപ്ലക്സുമായി വളരെ ബന്ധപ്പെട്ടതാണ്.
Distinguishing features | വർണാഭമായ സ്പോട് പാറ്റേൺ ഉള്ള കോട്ട്, തൊലിപ്പുറത്തെ വർണശബളമായ പുള്ളിക്കുത്തുകൾ, കുളമ്പിലെ ലംബമായ വരകൾ, വെളുത്ത ദ്രടപടലം തുടങ്ങിയവ ഇവയുടെ പ്രധാന സവിശേഷതകളാണ്. |
---|---|
Country of origin | യുണൈറ്റഡ് സ്റ്റേറ്റ്സ് |
Breed standards | |
അപ്പലൂസ ഹോഴ്സ് ക്ലബ് | Breed standards |
Horse (Equus ferus caballus) |
ലെപേർഡ് കോട്ട് പാറ്റേൺ ഉള്ള കുതിരകളുടെ ചിത്രങ്ങൾ യൂറോപ്പിലെ ചില ഗുഹകളിലെ ചരിത്രാതീത ചിത്രപ്പണികളിൽ കാണാം. പുരാതന ഗ്രീസിലേയും ഹാൻ രാജവംശത്തിന്റെ കാലത്തെ ചൈനയിലെയും ചിത്രപ്പണികളിൽ ഇത്തരം പാറ്റേൺ ഉള്ള ഇണങ്ങിയ കുതിരകളുടെ ചിത്രങ്ങൾ കാണാം. വടക്കേ അമേരിക്കയിൽ ശാന്തസമുദ്രത്തിന് അഭിമുഖമായ വടക്കുപടിഞ്ഞാറൻ പ്രദേശത്ത് താമസിച്ചിരുന്ന നെസ് പേഴ്സ് വർഗ്ഗത്തിലെ ആളുകളാണ് ഇത്തരം കുതിരകളുടെ അമേരിക്കൻ വംശാവലി വികസിപ്പിച്ചത്. ഇവിടേയ്ക്ക് കുടിയേറിയ ആളുകൾ ഇതിനെ "പാലൗസ് കുതിരകൾ" എന്ന് വിളിച്ചു. നെസ് പേഴ്സ് കൗണ്ടിയുടെ ഹൃദയഭാഗത്തുകൂടി ഒഴുകുന്ന പാലൗസ് നദിയുടെ പേരിൽ നിന്നാകാം ഈ പേര് വന്നതെന്ന് വിശ്വസിയ്ക്കപ്പെടുന്നു. ക്രമേണ ഈ പേരിൽ നിന്നാണ് "അപ്പലൂസ" എന്ന പേര് ഉരുത്തിരിഞ്ഞത്.
1877-ൽ നെസ് പേഴ്സ് യുദ്ധത്തിനുശേഷം നെസ് പേഴ്സ്കാരുടെ കുതിരകളുടെ ഭൂരിഭാഗവും നഷ്ടപ്പെട്ടു. അടുത്ത ഏതാനും ദശാബ്ദകാലത്തേയ്ക്ക് ഇവയുടെ എണ്ണം വളരെ കുറവായിരുന്നു. 1938-ൽ ബ്രീഡ് രജിസ്ട്രി എന്ന പേരിൽ അപ്പലൂസ ഹോഴ്സ് ക്ലബ്ബ് (APHC) രൂപീകരിക്കപ്പെടുന്നതുവരെ, ഇത്തരം കുതിരകളിൽ അതിയായ താല്പര്യമുള്ള വളരെ ചുരുക്കം എണ്ണം ആളുകൾ ചേർന്ന് ഇത്തരം കുതിരകളെ സംരക്ഷിച്ചു പോന്നിരുന്നു.
ഇന്ന് അമേരിക്കയിലെ ഏറ്റവും ജനപ്രിയമായ ഇനങ്ങളിൽ ഒന്നാണ് അപ്പലൂസ. 1975-ൽ ഐഡഹോയുടെ ഔദ്യോഗിക കുതിരയായി ഇതിനെ അവരോധിച്ചു. പാശ്ചാത്യ സവാരി മേഖലകളിൽ ഇത്തരം കുതിരകളെ സ്റ്റോക്ക് കുതിരയായി ഉപയോഗിയ്ക്കുന്നു. മറ്റു പലതരം ഇക്വസ്റ്റേറിയൻ രംഗങ്ങളിലും ഇവ വ്യാപകമായി ഉപയോഗിയ്ക്കപ്പെടുന്നു. അപ്പലൂസ കുതിരകൾ പല സിനിമകളിലും പ്രത്യക്ഷപ്പെട്ടിട്ടുണ്ട്. ഫ്ളോറിഡ സ്റ്റേറ്റ് സെമിനോളുകൾക്കായുള്ള മാസ്കോട്ട് ആണ് അപ്പലൂസ. ഇവയുടെ സന്തതിപരമ്പരകൾ മറ്റു പല സങ്കരയിനങ്ങളുടെ പ്രജനനത്തിനു വേണ്ടിയും ഉപയോഗിയ്ക്കപ്പെട്ടിട്ടുണ്ട്. അമേരിക്കയുടെ പോണി, നെസ് പേർസ് കുതിര, ചില ഗെയിറ്റഡ് ഹോഴ്സ് ഇനങ്ങൾ എന്നിവ ഉദാഹരണങ്ങളാണ്.