ധൂമകേതുവിന്റെ കോമ
From Wikipedia, the free encyclopedia
[1] ഒരു ധൂമകേതുവിന്റെ കോമ എന്നാൽ അതിന്റെ ന്യൂക്ലിയസിനു ചുറ്റുപാടും പൊതിഞ്ഞിരിക്കുന്ന നെബുലാവശിഷ്ടങ്ങൾ ആണ്. ഒരു ധൂമകേതു അതിന്റെ ദീർഘവർത്തുളമായ പാതയിലൂടെ സൂര്യന്റെ അടുത്തുകൂടി കടന്നുപോകുമ്പോൾ അതു ചൂടാവുകയും അതിന്റെ ഒരു ഭാഗം ആവിയാവുകയും ചെയ്യുന്നു. ഇങ്ങനെയാണ് കോമ ഉണ്ടാകുന്നത്. അങ്ങനെ ഇതിനെ ഒരു ദൂരദർശിനിയിലൂടെ നോക്കിയാൽ ഈ ധൂമകേതു ഒരു മങ്ങിയ ആവിയാകുന്ന രൂപത്തിൽ കാണാനാകും. അങ്ങനെ അതിനെ നക്ഷത്രങ്ങളിൽനിന്നും വേർതിരിച്ചു കാണാനാവും. കോമ എന്ന വാക്ക് ഗ്രീക്കു ഭാഷയിലെ "kome" (κόμη) എന്ന വാക്കിൽനിന്നുമുണ്ടായതാണ്. ഇതിനർഥം തലമുടി എന്നാണ്. കോമെറ്റ് എന്ന വാക്കും ഇതിൽ നിന്നുമുത്ഭവിച്ചതാണ്.
കോമ പൊതുവായി, മഞ്ഞുകട്ടയും ധൂമകേതുവിന്റെ പൊടികൊണ്ടും നിർമ്മിക്കപ്പെട്ടിരിക്കുന്നു. സൂര്യന് 3-4 ആസ്ട്രോണമിക്കൽ യൂണിറ്റ് അടുത്തെത്തുമ്പോൾ നൂക്ലിയസ് ഭാഗത്തു നിന്നും ബഹിർഗമിക്കുന്ന ആവിയാകുന്ന വസ്തുക്കളിൽ 90 ശതമാനവും വെള്ളമാണ്. ഫോട്ടോഡിസ്സോസിയേഷൻ, ഫോട്ടോഅയണൈസേഷൻ എന്നീ പ്രക്രിയകൾ വഴിയാണ് ജലതന്മാത്ര(H2O) വിഘടിച്ചില്ലാതെയാകുന്നത്. സൗരവാതം ഇത്തരത്തിൽ ജലത്തിന്റെ നാശത്തിനു ചെറിയതോതിൽ കാരണമാകുന്നുണ്ട്. വലിയ ധൂളിതരികൾ ധൂമകേതുവിന്റെ ഭ്രമണപാതയിലുടനീളം തങ്ങിനിൽക്കുകയും താരതമ്യേന ചെറിയ തരികൾ സൂര്യനിൽനിന്നും ദൂരേയ്ക്ക് ധൂമകേതുവിന്റെ വാലിലെയ്ക്ക് പ്രകാശമർദ്ദം മൂലം തള്ളിമാറ്റപ്പെടുകയും ചെയ്യുന്നു.