റോബർട്ട് ആഡം
From Wikipedia, the free encyclopedia
റോബർട്ട് ആഡം (1728 - 1792) ബ്രിട്ടനിലെ നവീനക്ലാസ്സിക് (neo-classic)[2] വാസ്തുവിദ്യാശൈലിയുടെ ആവിഷ്കർത്താക്കളിൽ പ്രമുഖനായിരുന്നു. പ്രശസ്ത വാസ്തുവിദ്യാകുശലനായിരുന്ന വില്യം ആഡമിന്റെ (1689-1748) ദ്വിതീയ പുത്രനായ ഇദ്ദേഹം സ്കോട്ട്ലൻഡിലെ ഫിഫെയിൻ കിർക്കാൽഡിയിൽ 1728 ജൂലൈ 3-നു ജനിച്ചു. പ്രശസ്ത ശില്പികളായ ജോൺ, ജെയിംസ്, വില്യം എന്നിവർ ഇദ്ദേഹത്തിന്റെ സഹോദരൻമാരായിരുന്നു. ഊർജസ്വലതയുള്ള പല്ലാഡിയൻ ശൈലിയിൽ അനേകം കെട്ടിടങ്ങൾ ഡിസൈൻ ചെയ്ത പ്രശസ്തനായ പിതാവുതന്നെയായിരുന്നു റോബർട്ട് ആഡമിന്റെ ആദ്യഗുരു. എഡിൻബറോയിലെ ഹൈസ്കൂളിലും സർവകലാശാലയിലും ആണ് റോബർട്ട് ആഡം വിദ്യാഭ്യാസം ചെയ്തത്. സി.എൻ. ക്ലെറിസോ എന്ന ഫ്രഞ്ചുവാസ്തുവിദ്യാവിദഗ്ദ്ധന്റെ കീഴിൽ ഇദ്ദേഹം 1755 മുതൽ 1757 വരെ പഠനം നടത്തി. നേപ്പിൾസ്, ഫ്ളോറൻസ്, വിസൻസാ, വെനീസ് മുതലായ സ്ഥലങ്ങളിൽ ഇവരൊരുമിച്ച് പഠനപര്യടനങ്ങൾ നടത്തുകയുണ്ടായി. ഈ പഠനപര്യടനങ്ങളുടെ അനന്തരഫലമായാണ് ദ് റൂയിൻസ് ഒഫ് ദ് പാലസ് ഒഫ് ദി എംപറർ ഡയക്ലീഷൻ അറ്റ് സ്പാലാട്രോ എന്ന കൃതി 1764-ൽ പ്രസിദ്ധീകരിച്ചത്.