Euskadi Ta Askatasuna
From Wikipedia, the free encyclopedia
La ourganizaçon Euskadi Ta Askatasuna (basco para Pátria Basca i Lhiberdade), mais coincida pula sigla ETA, era un grupo que praticaba l terrorismo cumo meio de alcançar la andependéncia de la region de l Paíç Basco (Euskal Heirria), de Spanha i Fráncia. La ETA tenie eideologie separatista/andependentista marxista- leninista i rebolucionária.
Era classeficada cumo un grupo terrorista puls gobernos de Spanha, de Fráncia i de ls Stados Ounidos, pula Ounion Ouropéia i por Anistia Anternacional. L sou símbolo era ua serpente anrolada nun machado. Fui fundada por nembros dissidentes de l Partido Nacionalista Basco. Durante la ditadura franquista, cuntou cul apoio de la populaçon i l'apoio anternacional, por ser cunsiderada ua ourganizaçon anti-regime, mas fui anfraquecendo debido al porcesso de democratizaçon an 1977. L sou lhema era Bietan jarrai, que quier dezir seguir nas dues, ó seia, na lhuita política i melitar.
Este grupo separatista reibindicaba la zona de l noroeste de la Spanha i de l sudeste de la Fráncia, na region montanhosa junto als Pirineus, birada para l Golfo de Biscaia, region chamada pul nome de Euskal Herria (Paíç Basco). ETA reibindicaba, an território spanhol, la region chamada Hegoalde ó Paíç Basco de l Sul, que ye custituída por Álaba, Biscaia, Guipúscoa i Nabarra; tamien reibindicaba, an território francés, la region chamada Iparralde ó Paíç Basco de l Norte, que ye custituída por Labour, Baixa Nabarra i Soule. L goberno spanhol estendiu l statuto de Quemunidade Outónoma Basca a trés probíncias - Álaba, Biscaia i Guipúscoa - de la qual Nabarra nun faç parte, tendo esta l'estatuto de la Quemunidade Foral de Nabarra.
La ETA fui criada an 1959, ouriginou de l Partido Nacionalista Basco (PNB), un partido político fundado an 1895 i que subrebibira na clandestinidade durante la ditadura de Francisco Franco (1939-1975).