Literatura bearnesa e gascona
From Wikipedia, the free encyclopedia
L'istòria de la literatura bearnesa e gascona que hè partida de la literatura occitana mes que se'n destria per'mor de las especificitats istoricas, politicas e lingüisticas de Bearn e deus país gascons (com ne son Armanhac, Bigòrra, Comenge, las Lanas e Bordèu – tant vau díser Guiana de lenga gascoa – Tolosa – teoricament gascoa sus l'arribèra occidentau de Garona).
Bearn que ho un estat sobeiran, au contra deus autes país gascons, e que vadó tanben reiaume dab l'aquesida de Navarra. Aqueth estat bearnés qu'arrosseguè los país gascons hens las soas aventuras politicas (com per exemple au moment de la Refòrma).
D'un punt de vista lingüistic, lo bearnés e lo gascon que son la medisha lenga e que partatjan especificitat qui'us destrian de la rèsta de la lenga d'òc.
L'autor lo mei ancian qu'agi composat en bèth revindicar que hosse lenga gascoa que ho lo trobador provençau Raimbaut de Vaqueiras. Los purmèrs autors respectivament gascons e bearnés a revindicar la loa lenga dehens sengles escrits que hon Pèir de Garròs e Arnaut de Saleta. Abans eths, mantun trobadors gascon que hè pareisher gasconismes en tot composar en koinè com ac hèn los tèxtes de las cancelerias gascoas e bearnesa deus Fòrs.