![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/0/04/NSRs_sametingsgruppe_2005-2009.jpg/640px-NSRs_sametingsgruppe_2005-2009.jpg&w=640&q=50)
Gákti
From Wikipedia, the free encyclopedia
Gákti (suomagillii: lapintakki d. lapinpuku d. saamelaispuku; dárogillii: kofte) lea sápmelaččaid čeardabivttas, mii lea seilon sámiid geavahusas botkekeahttá dálá áigái. Sámegákti lea sápmelaččaid álbmotlaš dovdomearkkain oinnoleamos ja danin dehálaš oassi sámiid kultuvra. Gávtti bokte johtá olu kultuvrralaš ja servotlaš diehtu, ovdamearka dihte gákti sáhttá muitalit geavaheaddji soga, gili dahje guovllu, gos son lea eret.
![Thumb image](http://upload.wikimedia.org/wikipedia/commons/thumb/0/04/NSRs_sametingsgruppe_2005-2009.jpg/640px-NSRs_sametingsgruppe_2005-2009.jpg)
![Thumb image](http://upload.wikimedia.org/wikipedia/commons/thumb/a/af/Erkki_Lumisalmi_s%C3%A1megiela_ja_maorigiela_eal%C3%A1skahttin_-semin%C3%A1ras_2.jpg/640px-Erkki_Lumisalmi_s%C3%A1megiela_ja_maorigiela_eal%C3%A1skahttin_-semin%C3%A1ras_2.jpg)
Dievddu ja nissona gávttit leat iešguđetláganat, muhto mánát geavahit seammalágan gávttiid go rávisolbmot. Gávttit hábmejit iežaset gáktemállejoavkkuid. Lea váttis diehtit galle gáktemálle gávdnojit Norgga ja Ruoŧa bealde. Mállet rivdet guovlluid mielde ja muhtumin juobe sogaid mielde nu, ahte ii leat álki diehtit mo iešguhtenai málle meroštallo. Gávttiid sáhttá juohkit giellajoavkkuid mielde Suomas leat davvisápmelaččaid anus golbma gávtti: Eanodaga gákti, Ohcejoga gákti, Vuohču/Soađegili gákti. Nuortalaččaid lea anus nuortalašgákti ja anáraččaid anárašgákti. Juohke gáktemálles gávdnojit vel variašuvnnat omd. geasse- dahje liidnegákti. Duojárat leat maiddái rekonstrueregoahtán ng. boares gáktemálliid ođđaáigásažžan.