குளோரேட்டு
From Wikipedia, the free encyclopedia
குளோரேட்டு (Chlorate) எதிர்மின் அயனியின் மூலக்கூற்று ஆகும்வாய்ப்பாடு ClO−3 ஆகும். இந்த எதிர்மின் அயனியில் குளோரின் +5 என்ற ஆக்சிசனேற்ற நிலையில் உள்ளது. குளோரேட்டு எதிர்மின் அயனியைக் கொண்டுள்ள எந்த வேதிச் சேர்மத்தையும் ஒரு குளோரேட்டு என்று வரையறுக்கலாம். குளோரிக் அமிலத்தின் உப்புகள் பொதுவாக குளோரேட்டுகள் என்றழைக்கப்படுகின்றன. குளோரேட்டு என்ற சொல்லுடன் உரோமன் எண் அடைப்புக் குறிக்குள் கொடுக்கப்படுகிறது. உதாரணமாக குளோரேட்டு(VII) என்பது ஒரு குறிப்பிட்ட குளோரினுடைய ஆக்சி எதிர்மின் அயனியாகும்.
இணைதிறன் கூடு எலக்ட்ரான் இணை தள்ளுகை கொள்கையில் முன் கணிக்கப்பட்டபடி குளோரேட்டு அயனிகள் முக்கோண பட்டைக்கூம்பு வடிவத்தில் உள்ளன.
குளோரேட்டுகள் வலிமையான ஆக்சிசனேற்றிகள் என்பதால் அவை எளிதில் ஆக்சிசனேற்றமடையும் பொருள்கள் மற்றும் கரிம வேதியியல் பொருட்களிடமிருந்து தொடர்பு கொள்ளாத வகையில் தொலைவாக தள்ளி வைக்கப்படவேண்டும். குளோரேட்டு உப்பின் கலவைகளுடன் சர்க்கரை, மரத்தூள், மரக்கரி, கரிமக் கரைப்பான்கள், உலோகங்கள் போன்ற கிட்டத்தட்ட எரியும் பொருட்கள் தொடர்பு கொள்ள நேரிட்டால் உடனடியாக எரிவிக்கப்படுகின்றன. இந்த காரணத்திற்காகவே ஒரு காலத்தில் வானவேடிக்கை பொருட்களில் குளோரேட்டுகள் பயன்படுத்தப்பட்டன. இருப்பினும் இவற்றின் நிச்சயமற்ற நிலைப்புத்தன்மை காரணமாக இவற்றின் பயன்பாடுகள் குறைந்து விட்டன. முன்னதாக குளோரேட்டுகளை பயன்படுத்தி வந்த பயன்பாடுகளில் தற்போது பெர்குளோரேட்டுகள் பயன்படுத்தப்படுகின்றன.
குளோரேட்டு அயனியை ஒரு லூயிசு கட்டமைப்பால் திருப்திகரமாக பிரதிநிதித்துவப்படுத்த முடியாது, ஏனெனில் அனைத்து Cl-O பிணைப்புகளும் ஒரே நீளம் கொண்டுள்ளன. பொட்டாசியம் குளோரேட்டில் அனைத்து Cl-O பிணைப்புகளும் 1.49 ஆங்சிட்ராங் நீளம் கொண்டவையாகும். இங்கு குளோரின் அணு மீயிணைதிறன் கொண்டதாக உள்ளது. அதற்கு பதிலாக இது பெரும்பாலும் பல அதிர்வு கட்டமைப்புகளின் கலப்பினமாக கருதப்படுகிறது.