ఆస్ట్రేలియాలో హిందూమతం
From Wikipedia, the free encyclopedia
2016 జనాభా లెక్కల ప్రకారం 4,40,300 పైచిలుకు అనుయాయులున్న హిందూమతం ఆస్ట్రేలియాలో మైనారిటీ మతం. దేశ జనాభాలో 1.9% మంది హిందువులు. [1] ఆస్ట్రేలియాలో వలసల ద్వారా వేగంగా అభివృద్ధి చెందుతున్న మతాలలో హిందూమతం ఒకటి. [2] యువకుల్లో అత్యధిక వ్యాప్తిలో ఉన్న మతాలలో హిందూమతం కూడా ఒకటి. హిందువులలో 34% మంది 14 ఏళ్లలోపు, 66% మంది 34 ఏళ్లలోపు వారు. [3]
సంవత్సరం | జనాభా | ±% |
---|---|---|
1911 | 414 | — |
1933 | 212 | −48.8% |
1986 | 21,500 | +10041.5% |
1991 | 43,580 | +102.7% |
1996 | 67,270 | +54.4% |
2001 | 95,473 | +41.9% |
2006 | 1,48,123 | +55.1% |
2011 | 2,75,534 | +86.0% |
2016 | 4,40,300 | +59.8% |
పంతొమ్మిదవ శతాబ్దంలో, పత్తి, చెరకు తోటలలో పని చేయడానికి బ్రిటిషు వారు మొదటిసారిగా హిందువులను భారతదేశం నుండి ఆస్ట్రేలియాకు తీసుకువచ్చారు. వారిలో చాలామంది చిన్న వ్యాపారులుగా, ఒంటెలను తోలేవారిగా, వ్యాపారులుగా, చిరువ్యాపారులుగా పని చేస్తూ, చిన్న గ్రామీణ ప్రాంతాల్లో వస్తువులను అమ్ముకుంటూ అక్కదె ఉండిపోయారు. ప్రస్తుత కాలంలో హిందువులు మెడిసిన్, ఇంజనీరింగ్, కామర్స్, ఇన్ఫర్మేషన్ టెక్నాలజీ వంటి రంగాలలో నిపుణులు. ఆస్ట్రేలియాలోని హిందువులు ఎక్కువగా భారతీయ మూలానికి చెందినవారు కాగా, గణనీయమైన సంఖ్యలో శ్రీలంక, ఫిజియన్, మలేషియన్, సింగపూర్, నేపాల్ మూలాలు కలిగినవారు కూడా ఉన్నారు.