బెల్ట్ అండ్ రోడ్ ఇనిషియేటివ్
From Wikipedia, the free encyclopedia
బెల్ట్ అండ్ రోడ్ ఇనిషియేటివ్ అనేది చైనా ప్రభుత్వం 2013 లో చేపట్టిన ప్రపంచవ్యాప్త అభివృద్ధి వ్యూహం. ఆసియా, యూరప్, ఆఫ్రికాల్లోని దాదాపు 70 దేశాలు, అంతర్జాతీయ సంస్థల్లో మౌలిక సదుపాయాల అభివృద్ధి, పెట్టుబడులు ఇందులో భాగంగా ఉన్నాయి. [1] [2]
స్థాపన | 2013; 11 సంవత్సరాల క్రితం (2013) 2017 (2017) (Forum) |
---|---|
కేంద్రీకరణ | "పరస్పర సాంస్కృతిక మార్పిడి ద్వారా ఏకీకృతమైన పెద్ద మార్కెట్టును నిర్మించడం, అంతర్జాతీయ, దేశీయ మార్కెట్లను పూర్తిగా ఉపయోగించుకోవడం. సభ్యదేశాల మధ్య పరస్పర అవగాహనను, విశ్వాసాన్నీ పెంపొందించడం. అంతిమంగా మూలధన ప్రవాహం, ప్రతిభా సంచయం, టెక్నాలజీ డేటాబేస్ లను పెంపొందించడం" |
కార్యస్థానం | |
సేవా ప్రాంతాలు | ఆసియా ఆఫ్రికా ఐరోపా మధ్య ఆసియా అమెరికాలు |
నేత | షీ జిన్పింగ్ (2019) |
చైనా సర్వోన్నత నాయకుడు షీ జిన్పింగ్ మొదట 2013 లో ఇండోనేషియా, కజకిస్థాన్లలో చేసిన అధికారిక పర్యటనల సందర్భంగా ఈ వ్యూహాన్ని ప్రకటించారు. ఈ పేరులోని "బెల్ట్" అనేది నేలపై నున్న రోడ్లు, రైలు మార్గాలను సూచిస్తుంది. దీనిని " సిల్క్ రోడ్ ఎకనామిక్ బెల్ట్ " అని పిలుస్తారు; పేరు లోని "రోడ్", సముద్ర మార్గాలను సూచిస్తుంది. దీన్ని 21 వ శతాబ్దపు మారిటైమ్ సిల్క్ రోడ్డును అనవచ్చు.[3]
గతంలో దీన్ని వన్ బెల్ట్ వన్ రోడ్ అనేవారు. 2016 నుండి దీనిని బెల్ట్ అండ్ రోడ్ ఇనిషియేటివ్ (BRI ) గా పిలుస్తున్నారు. ఆ పేరులో వన్ అనే పదానికిస్తున్న ప్రాధాన్యత వలన ఈ పథకాన్ని పార్థం చేసుకునే అవకాశం ఉందని చైనా ప్రభుత్వం భావించింది. అయితే, "వన్ బెల్ట్ వన్ రోడ్" అనే పేరును ఇప్పటికీ చైనీస్ భాషా మీడియాలో వాడుతున్నారు.[4]
చైనా ప్రభుత్వం, "ప్రాంతీయ కనెక్టివిటీని పెంచడానికీ, ఉజ్వల భవిష్యత్తును సాధించడానికీ చేసే ప్రయత్నం" అని ఈ కార్యక్రమం గురించి చెబుతుంది.[5] కొంతమంది పరిశీలకులు దీనిని చైనా కేంద్రంగా వాణిజ్య నెట్వర్కును నెలకొల్పి, తద్వారా ప్రపంచ వ్యవహారాల్లో చైనా ఆధిపత్యం స్థాపించే ప్రయత్నంగా చూస్తారు.[6] [7] ఈ ప్రాజెక్టును పీపుల్స్ రిపబ్లిక్ ఆఫ్ చైనా ఏర్పడిన 100 వ వార్షికోత్సవమైన 2049 నాటికి పూర్తి చెయ్యాలని సంకల్పించారు.[8]