Amie Venter

Abraham Adriaan (Amie) Venter (11 Maart 1937 – 4 Julie 2012, Klerksdorp) was 'n Suid-Afrikaanse politikus, lid van die Nasionale Party, lid van die Volksraad vir die Klerksdorp-kiesafdeling (1974–1994) en lid van die PW Botha- en De Klerk-regerings.

Amie venter
Lid van die Noordwes provinsiale wetgewer
Ampstermyn 1994 – 2004
Minister van Begroting en Plaaslike Owerhede
Ampstermyn 1989 – 1994
President	F.W. de Klerk
Minister van Openbare Werke, Behuising en Plaaslike Administrasie
Ampstermyn 1984 – 1989
Eerste minister	P.W. Botha
Adjunkminister van Handel en Nywerheid
Ampstermyn 1982 – 1983
Eerste minister	P.W. Botha
Persoonlike besonderhede
Gebore	11 Maart 1937
Sterf	4 Julie 2012 (op 75) Klerksdorp
Politieke party	Nasionale Party

Venter was die leier van die Nasionale Party (1994-1997) en van die Nuwe Nasionale Party (1998–2005) vir die Noordwes-provinsie, en later provinsiale vise-president van die Demokratiese Alliansie (2000-2001). Verder was Venter 'n lid van die Noordwes provinsiale wetgewer (1994-2004), lid van die uitvoerende kabinet van Popo Molefe (1994-1996) en voorsitter van die staande komitee op openbare rekeninge (Skoor, 1999-2004).

Loopbaan

Amie Venter is die seun van Abraham Adriaan Venter, voormalige kanselier van die Potchefstroomse Universiteit vir C.H.O. en predikant in die Gereformeerde Kerke in Suid-Afrika, en sy vrou Hester Snyman.

Ná sy regsstudies het Amie Venter 'n prokureur geword. Hy het ook 'n politieke loopbaan binne die Nasionale Party gevolg en is verkies tot die Volksraad in die 1974-verkiesing in die voormalige setel van Petrus Cornelius Pelser. Hy was voorsitter van die Nasionale Party in Wes-Transvaal en word in 1982 adjunkminister vir handel en nywerheid.

In 1984 word hy bevorder tot die pos van Minister van Openbare Werke, Behuising en Plaaslike Administrasie en rapporteer aan die Blanke Volksraad.

In 1989 word hy aangestel as Minister van Begroting en Plaaslike Owerhede in die Kabinet van F.W. de Klerk.