Indusium

Die Indusium is die eerste chronostratigrafiese etage sowel as geologiese tydsnede van onderskeidelik die sisteem en periode Trias. Dit verwys dus na ’n tydperk sowel as die gesteentes wat in dié tydperk gevorm het.

Periode/ sisteem	Epog/ serie	Tydsnede/ etage	M. jaar gelede
Jura	Vroeg	Hettangium	jonger
Trias	Laat	Rhaetium	201,3–208,5
		Norium	208,5–~228
		Karnium	~228–~235
	Middel	Ladinium	~235–~242
		Anisium	~242–247,2
	Vroeg	Olenekium	247,2–251,2
		Indusium	251,2–252,2
Perm	Lopingium	Changhsingium	ouer
Die verdeling van die Trias (IKS).

Die tydperk was van sowat 252,2 tot 251,2 miljoen jaar gelede.^[1] Dit is voorafgegaan deur die laaste etage/tydsnede van die Perm, die Changhsingium, en gevolg deur die Olenekium.

Naam en definisie

Die Indusium is genoem na die rivier Indus in Indië en Pakistan. Die oorspronklike tipeligging van die etage kom aan die oewers van dié rivier voor. Die basis van die etage word gedefinieer deur die eerste voorkoms van die Conodonta Hindeodus parvus en die bopunt van die negatiewe δ¹³C-waarde, ’n bietjie bo die Perm-Trias-uitwissing. Die bokant van die etage word gedefinieer deur die eerste voorkoms van die ammoniete Hedenstroemia en Meekoceras gracilitatis en van die Conodonta Neospathodus waageni.