Arbetstääg für die alemannischi Dialäktology
Arbetstääg vo den alemannische Dialäktolooge / From Wikipedia, the free encyclopedia
D Arbetstääg für die alemannischi Dialäktology, früener Arbetstääg vo den alemannische Dialäktolooge oder, wie d Dialäktolooge sälber säge, eifach d Alemannetagige, sind Träffe vo Sproochwüsseschafter, wo Frooge vom Alemannischen undersueche.
Bi dene wüsseschaftliche Tagige, wo all drüü Joor im ene Oort vo dr Alemannia stattfinde, bespräche Fachlüüt vo dr Linguistik Sache vo der alemannische Sprooch – oder vom Weschtoberdüütsche, wie men au seit – und psunders die regionale Underschiid zwüsche de verschidene Dialäkt im alemannische Sproochruum. Es goot um alli mögleche Gsichtspünkt vo der modärne Dialäktology, öppe um d Sproochgeografy und der Sproochkontakt, um d Sproochgschicht und d Sprochveränderig und trum wie me d Sprooch im Alltag pruucht, um d Grammatik und d Syntax vo de Dialäkt, und um d Methode vo der Lexikografy und d Entwicklig vo de alemannische Grosswörterbüecher. D Tagigsteilnämer chömen ame zur Hauptsach us em oberdütsche Ruum vo Tüütschland, der Schwiiz, Öschtrych und Frankrych, und mängmol au no vo wyter wägg und us anderne Länder, und sie stelle die aktuelli Forschig a de Universitäte und bi anderne Instituzioone vor und diskutiere d Arbetsergäbnis und nöji Frooge.
D Vorträäg vo de meischte vo dene wüsseschaftleche Verastaltige sind publiziert und gänd e guete Überblick über s Arbetsgebiet vo der regionale Dialäktology.