D Etichone
en elsässischs Aadelsgschlächt / From Wikipedia, the free encyclopedia
D Etichone si en elsässischs Herzogsgschlächt gsi. Iire Naame chunnt vom Herzog Eticho, wo in dr Middi vom 7. Joorhundert äine vo de erste bekannte Herzög vom Elsass gsi isch und wo mit em d Herzogswürde erblig worde isch. S Gschlächt het in dr Gschicht vom Elsass im früeje Middelalter e wichdigi Rolle gspiilt.
D Herzög vom Elsass häi iire Woonsitz zum Däil in nöi entstandene Ort wie Obereenhäim und uf dr Hoocheburg gha. Dört het dr Eticho s Stift gründet, wo si Dochder, die häiligi Odilia, mit iire Schwöstere gläbt het. Spööteri Dynastie, zum Bischbil d Habsburger, häi vilmol iire Ursprung uf e Herzog Eticho (au Attich oder Adalrich) zrugggfüert.
Die äinzelne Linie in dr Genealogii vo de Etichone wärde bezäichnet as
- Etichone, (im ängere Sinn) mit em Ditel vom ene Herzog im Elsass
- Liutfride, mit em Ditel vom ene Groof im Sundgau, bzw
- Eberhard, mit em Ditel vom ene Groof im Nordgau bzw. Groofe vo Egishäim, Dagsburg und Metz. S bekanntiste Familiemitgliid isch dr Bruno vo Egishäim, wo 1049 as Leo IX. Babst worde isch.
D Etichone si im 13. Joorhundert usgstorbe, wo bäidi Söön vom Groof Albert II. im Joor 1202 bim ene Durnier z Andain umchoo si.