Gala Éluard Dalí
From Wikipedia, the free encyclopedia
D Gala Éluard Dalí, bekannt as Gala, geboore as Jelena Dmitrijewna Djakonowa (russisch Елена Дмитриевна Дьяконова; * 26. Augschtejul./7 Septämbergreg. 1894 z Kasan, Russland; † 10. Juni 1982 z Portlligat, Schbanie) isch e bekannti Muse im 20. Joorhundert gsi. Si het e Hufe Künstler inspiriert, bsundrigs Surrealiste. Zu iine ghööre iiri bäide Manne, dr Dichder Paul Éluard und dr Mooler und Bildhauer Salvador Dalí, und dr Mooler Max Ernst, wo s mit em e Liebesbezieig ghaa het. Si isch fast fuffzig Joor mit em Dalí verhürootet gsi und in dere Zit isch er zum finanziell erfolgriichste Künstler vo siner Generazioon worde, was dä siner Frau au öffentlig dankt het drfür.[1]
Vo wo iir Pseudonym Gala chunnt, isch nid sicher. Mä dänkt ass es e Diminutiv vo Galina chönnt si, e Vornaame, wo in dr Ukraine wit verbräitet isch. Aber dä wird eender as Galja brucht. Dr Naame Galina het si vermuetlig vo iirer Mueter überchoo, wääred iire Vater dr Vornaame Jelena vorzooge het und dä isch mindestens in de offizielle Dokumänt brucht worde.