Dr Schwöbisch Bund
From Wikipedia, the free encyclopedia
Dr Schwöbisch Bund (au Bund im Land Schwoobe) isch e Zämmeschluss vo de schwöbische Riichsständ im 15. Joorhundert gsi.
Dr Bund isch am 14. Februar 1488 uf em Riichsdaag z Esslinge am Neckar gründet worde uf d Iniziative vom Kaiser Friedrich III..
Näbe Territorialfürste wie em Herzog vom Tirol und em Groof und spöötere Herzog vo Württebärg si dr Hoochi Aadel wie d Wärdebärg, d Montfort, d Gundelfinge, d Hälfestäi, d Waldburg und d Fürstebärg verdräte gsi und Ritter und Edelchnächt vom Niidere Adel wie au Prelate vo de Gäistlige Territorie. Au die 20 schwöbische Riichsstedt häi chönne ufgnoo wärde. Dr Hauptort vom Bund isch Ulm gsi. Dr schwöbisch Bund isch e wäsentligs Instrumänt vo dr Riichsreform gsi und em Landfriide, wo mit em verbunde gsi isch. Vo do isch si verfassigsgschichtligi Bedütig cho. Ass er über d Fachkräis uuse bekannt isch, verdankt er sinere Rolle bim Niiderschloo vom Buureufstand.
Dr Schwöbisch Bund isch 1534, e baar Joor noch dr Reformazioon, usenanderbroche wäge de underschidlige konfessionelle Standpünkt vo sine Mitgliider: D Riichsstedt si mäistens protestantisch gsi und die aadlige Territorialherrscher katholisch.
Württebärg, wo protestantisch worde isch nochdäm s dr Herzog Ulrich 1534 zruggerooberet het, het sich denn im Schmalkaldische Bund aagschlosse, wo 1531 vo Ulm, Konstanz, Biberach und andere Stedt gründet worde isch.