Söldner
e Soldat wo für Gäld dient / From Wikipedia, the free encyclopedia
E Söldner isch e Soldat, wo für Gäld (Sold) aagworbe wird. Mäistens dient er für e gwüssi Zit und isch dur e Verdraag bunde. S Söldnerwääse het s scho in dr Antike gee. Es het vom Middelalter bis zur Franzöösische Revoluzioon s öiropäische Milidäärwääse brägt. Söldner si sältener worde, wo stehendi Heer und die allgemäini Weerpflicht iigfüert worde si. Im 20. Joorhundert häi Söldner u. a. in de Chrieg und Bürgerchrieg in Afrika, Asie und uf em Balkan kämpft. Mä het sä vor allem in Situazioone gfunde, wo d Staate schwach gsi si. Hützudags, in ere Zit vo dr Brivatisierig vo staatlige Funkzioone und dr schliichende Kapitaluzioon vo de demokratische Chreft vor em globale Kapitalismus, verbräitet sich s Söldnerwääse wider, vilmol in dr Form vo Sicherhäitsundernääme.
In vile Länder isch s Söldnerwääse gsetzlig verbote und wär in ere fremde Armee Chriegsdienst läistet, cha stroofgsetzlig verfolgt wärde. Im Allgemäine wird so öbbis mit Gfängnis bestrooft, aber en Ööstriicher, wo in ere fremd Armee dient het, cha under Umständ si ööstriichischi Bürgerschaft verliere oder e Schwizer wäge Landesverroot vor Gricht cho.