Liberales Judentum

S liberale Juudedum (au Progressivs Juudedum oder, bsundrigs in Nordamerika, Reformjuudedum) isch e Ströömig innerhalb vo dr jüüdische Religioonsgmäinschaft. Sini Ursprüng lige vor allem im Dütschland vom 19. Joorhundert und göön uf Ideä vom Abraham Geiger, Samuel Holdheim, David Einhorn, Kaufmann Kohler und vo andere zrugg. S liberale Juudedum isch äini vo de vier Hauptströömige im gegewärtige Juudedum (orthodox, konservativ, liberal, rekonstrukzionistisch), wo in alle sine Wersioone öbbe 1'750'000 vo de rund 14 Millioone Juude drzue ghööre. Die verschiidene Reform-und-liberale Grubbe uf dr ganze Wält zämme mit de Rekonstrukzioniste si alli Mitgliider vo dr Wältunion für progressivs Juudedum.

Dr Rabbiner Abraham Geiger.

Grundsetz

S Reformjuudedum däilt die jüüdische Gebot in ethischi und rituelli Gsetz ii. Die ethische Gsetz si zitlos und unveränderlig, die rituelle Gsetz hingege chönne veränderet wärde, zum si em Lääbensumfäld vo de Glöibige aazbasse. Im Gegesatz zum orthodoxe Juudedum goot s Reformjuudedum von ere Offebaarig vo Gott us, wo in dr Gschicht immer witer goot. D Offebaarig chunnt vo Gott und wird dur Mensche vermiddlet. Es isch e dünamische und kontinuierlige („progressive“) Brozäss und nit dr äimoolig Akt, wo dr Mose vo Gott wörtlig d Tora („schriftligi Leer“) und alli Usleegige („mündligi Leer“, spööter im Talmud und in dr Rabbinische Litratuur ufgschriibe) überchoo het.

Lueg au

•  Portal:Judetum
• S Orthodoxe Judetum

Litratuur

• Michael A. Meyer: Response to Modernity. A history of the Reform Movement in Judaism. Oxford University Press, New York NY u. a. 1988, ISBN 0-19-505167-X (Studies in Jewish history), (deutsch: Antwort auf die Moderne. Geschichte der Reformbewegung im Judentum. Böhlau, Wien u. a. 2000, ISBN 3-205-98363-7).