Universität Freiburg (Schweiz)

D Uniwersidäät Friburg (franzöösisch Université de Fribourg [ynivɛʀsite də fʀibuʀ], dytsch Universität Freiburg, latiin. Universitas Friburgensis) z Friburg im Üechtland (franzöösisch Fribourg) isch die säggstgrössti und äinzigi zwäisproochigi Uniwersidäät in dr Schwiz.^[3]

Université de Fribourg Universität Freiburg
Motto	«Partager les savoirs – gemeinsam Wissen schaffen»
Gründig	1889
Drägerschaft	staatlig: Kanton Friburg
Ort	Friburg, Schwiz
Räktere	Katharina Fromm (sit Februar 2024)
Studänt*ene	10'248 (2014)
Mitarbeiter*ne	2176 (2014)
Johresbudget	207 Millione CHF (2014)
Netzwärch	BeNeFri
Website	www.unifr.ch

Studänte an dr Uniwersidäät Friburg^[1][2]

Studiejoor	Studänte
1990/1991	6'327
1995/1996	8'746
2000/2001	8'849
2005/2006	9'936
2006/2007	9'912
2007/2008	9'952
2009/2010	9'617
2010/2011	9'651
2013	10'164
2014	10'248

Übersicht

An dr Uniwersidäät si 2014 2176 Persone (dodrvo 140 Ordinarie, 107 assoziierti Brofässer und 278 Leerbeufdragti und 826 wüsseschaftligi Mitarbäiter) beschäfdigt gsi, 10'248 Studänte (5971 Fraue und 4277 Manne, 8448 mit Woonsitz in dr Schwiz) si iigschriibe gsi. D Zaal vo de Studierende het sich in de letschte 15 Joor mee as verdobblet, 2003/04 si s zum erste Mol mee as 10'000 gsi. Im Joor 2014 isch d Muetersprooch vo 3645 Studierende Dütsch gsi, vo 4056 Französisch und vo 999 Italiänisch Muttersprache.^[4]

D Uniwersidäät befindet sich im Gränzgebiet zwüsche dr Dütschschwiz und em Wältschland. Die mäiste Studiegäng wärde uf Dütsch und uf Französisch aabote, was Studierendi us dr ganze Schwiz und dr Wält aazieht: Dr Däil vo Studierende us andere Kantöön isch im Vergliich zu andere Schwizer Hochschuele überdurchschnittlig hooch, und öbbe 20 Brozänt vo de iigschribene Studierende stamme us em Usland. D Uniwersidäät Friburg isch zämme mit dr Uniwersidäät z Cluj, dr Uniwersidäät Luxeburg und dr Freie Uniwersidäät Boze äini vo de meersproochige Uniwersidääte in Öiropa.

Gschicht

Dr Hindergrund für d Gründig von ere Uniwersidäät in ere eender chliine Stadt isch dr Kulturkampf gsi, wo in de 1870er Joor s sekuläre Staatswääse in dr Schwiz sich witgehend gege d Aasprüch vo dr Kurie duuregsetzt het. Schwizerischi Katholike häi druf en Uniwersidäät im ene katholische Kanton welle, wo noch em katholisch-konservative Staatsroot Georges Python Elite söll usbilde, wo s Volk vor de Gfoore vo dr Modärne wurde schütze.^[5] Drotzdäm isch d Uniwersidäät offiziell nie e «katholischi Uniwersidäät» gsi.

D Uniwersidäät isch 1889 entstande, wo am 4. Oktober dr Grooss Root vom Kanton Friburg für d Gründig vo dr erste Uniwersidäät in dr katholische Schwiz grüens Liecht gee het. Für die Hochschuel het vor allem dr Python hartnäckig kämpft. Es isch em glunge, die finanzielle Middel z beschaffe und d Politiker drvo z überzüüge, ass en Uniwersidäät nöötig sig.

S Kollegium Sankt Michael, wo 1582 gründet worde isch, und bsundrigs si theologischi Fakultät wärde as die ersti Käimzälle vo dr Uniwersidäät aagluegt. E witeri Vorlöifere vo dr Uniwersidäät isch e Rächtsakademii («Rächtsschuel») z Friburg im Joor 1763, wo sich im Albertinum befunde het und wo sich 1889 dr nöi gründete Uniwersidäät as Juristischi Fakultät aagliideret het.^[6][7][8]

1941 isch s Hauptgeböid Miséricorde (Barmhärzigkäit) an dr Avenue de l’Europe z Friburg, iigweit worde. Es isch vom Le Corbusier-Schüeler Denis Honegger entworfe worde und stoot hüte under Dänggmolschutz. Sit em Oktober 2005 het d Uniwersidäät uf em Plateau de Pérolles e nöis Geböid für 2'200 Studierendi an dr Wirtschafts- und Sozialwüsseschaftlige Fakultät, grad näbe andere Uniwersidäätsgeböid und dr Fachhochschuel.

Uniwersidäät Friburg: s Hauptgeböid Miséricorde

Dr Campus vo Pérolles 2 (Wirtschafts- und Sozialwüsseschaftligi Fakultät), wo 2005 eröffnet worde isch

D Fakultäte

D Uniwersidäät Friburg bestoot us fümf Fakultäte und bietet e Hufe Studiegäng aa:

• Die Filosofischi Fakultät isch am grösste und het öbbe 4'000 Studierendi. Die gönge zu Vorlääsige und Seminar in de Beriich Filosofii, historischi Wüsseschafte, Sprooche, Litratuur, Pedagogik, Psüchologii oder Sozialwüsseschafte. Läitbilder vo dr Usbildig si d Meersproochigkäit (dütsch-französisch) und s Studium vo de Kontakt und Beziejige zwüsche de Kulture vo früener und hüt.

• An dr Rächtswüsseschaftlige Fakultät studiere öbbe 1'900 Persone. Dr Studieblaan umfasst nazionals und internazionals Rächt; die Beriich chönne zwäisproochig studiert wärde. Bsundrigs isch, ass es an dr Rächtswüsseschaftlige Fakultät für sproochbegabti Studierendi mööglig isch, soch im Brogramm «bilingue plus» lo usbilde, wo diefi Kenntniss vo dr dütsche und französische Sprooch und Kultur vermiddlet.

• Die Theologischi Fakultät isch die grössti und internazionalsti in dr Schwiz und näbe Luzärn die äinzigi katholisch-theologischi Fakultät an ere staatlige Uniwersidäät in dr Schwiz.

• An dr Wirtschafts- und Sozialwüsseschaftlige Fakultät si rund 1'900 Studierendi^[9] für äine vo de fümf Bätscheler- oder Masterstudiegäng iigschriibe. D Fakultät bestoot us vier Departemänt: Bedriibswirtschaftsleer, Volkswirtschaftsleer, Informatics und Medie- und Kommunikazionswüsseschafte. Zu dere Fakultät ghööre au s International Institute of Management in Technology (iimt) und s Verbandsmanagement Institut (VMI).

• Die Mathematisch-Naturwüsseschaftligi Fakultät isch 1896 gründet worde und umfasst siibe Departemänt und 14 Studiefächer: Biochemii, Biologii, Chemii, Geografii, Informatik, Human- und Zaanmedizin, Mathematik, Nöirowüsseschaft, Farmazii, Füsik, Biomedizinischi Wüsseschafte, Umwältwüsseschafte, Ärdwüsseschafte (Geologii) und Sport. D Forschig und die braktische Aawändige spiile an dere Fakultät e zentrali Rolle, was dr überdurchschnittlig hoochi Däil an Doktorierende erklärt.

Witeri akademischi Iirichdige und interfakultäri Instidut

• S Adolphe-Merkle-Instidut für Nanotechnologii
• S interdisziplinäre Instidut für Ethik und Menscherächt
• S Instidut für Familieforschig und -berootig
• S interfakultäre Instidut für Ost- und Ostmiddelöiropa
• S Zentrum für Öiropastudie
• S Zentrum für Testentwigglig und Diagnostik (verantwortlig für en Äignigstest für s Medizinstudium)
• S Departemänt für Informatik (ghört zu dr wirtschafts- und sozialwüsseschaftlige Fakultät und dr mathematisch-naturwüsseschaftlige Fakultät)
• S Instidut für Sport
• Umwältwüsseschafte^[10]

Litratuur

• Altermatt, Urs: Die Universität Freiburg auf der Suche nach Identität. Essays zur Kultur- und Sozialgeschichte der Universität Freiburg im 19. und 20. Jahrhundert. Acad. Press, Fribourg 2009, ISBN 978-3-7278-1600-0.
• Claude Hauser: Universität Freiburg. In: Historisches Lexikon vo dr Schwiiz..
• Christoph Allenspach: Die Universität Miséricorde in Freiburg (= Schweizerische Kunstführer, Nr. 355). Usegee vo dr Gesellschaft für Schweizerische Kunstgeschichte GSK. Bärn 1984, ISBN 3-85782-355-0.

Weblingg

 Commons: Uniwersidäät Friburg – Sammlig vo Multimediadateie

• Website vo dr Uniwersidäät Friburg
• Forschigsdatebank FUTURA