حملة نابوليون على الشام
From Wikipedia, the free encyclopedia
حملة نابوليون على الشام هى حملة فاشلة شنها نابوليون بونابرت على الشام لإحتلالها سنة 1799 وارتكب وقتها مدبحة كبيرة فى يافا بقتله ل 3000 اسير. بعد فشل الحملة كذب نابليون على المصريين فى القاهره.
بعد ما نجح بونابرت فى إحتلال مصر وقت الحملة الفرنساوية سنة 1798 عليها بدأ بالنظر الي الشام للشام . فى بداية فبراير 1799 خرج جيش فرنسا من القاهره فى إتجاه الشام، و بعد ما وصل الجيش العريش فى 6 فبراير بعت نابوليون تانى يوم خبر لحكومة باريس بإنه ابتدى حملته على الشام ، و شرح إن غرضه بيتلخص فى تلت حاجات هى: تدعيم موقف الفرنساوية فى مصر و منع إقتحامها عن طريق أى جيش تانى ممكن يهاجمها من الشمال أو بمشاركة أى جيش أوروبى. و الغرض التانى هو ارغام السلطان العثمانى فى استنبول على توضيح موقفه من الفرنساويين، و التالت هو حرمان المراكب الانجليزيه فى البحر المتوسط من التموين من موانى ساحل الشام.
بعد ما وقعت قلعة العريش فى ايدين الفرنساويه اتقدم جيشهم و استولى على غزه و الرمله و حاصر يافا ، و بعد ما سقطت يافا فى ايديهم بعد حصار دام اربع تيام اخدو 3000 اسير من الاهالى و اعدموهم بعد كده فى مدبحه وحشيه. بعد ماخلص نابوليون من يافا راح على عكا و بدأ حصارها فى 18 مارس 1799 بعد مارفض واليها الجزار باشا الاستسلام. نابليون رغم كل المحاولات ما قدرش يقتحم عكا اللى فضلت صامده و بتقاوم بإستبسال بقيادة أحمد باشا الجزار. جيش نابوليون كان جيش برى مافيهوش مراكب حربيه و عشان كده ماقدرش يحاصر المدينه من البحر اللى كانت بتوصل منه امدادات للمحاصرين ساهمت فى صمودهم بشكل فعال. فضل نابوليون يشن هجوم ورا هجوم من غير نتيجه و فى 4 و 8 و 10 مايو شن هجمات ضخمة لكن برضه ماجابتش نتيجه و فضلت المدينة صامدة فماكانش قدامه حل غير إنه يفك الحصارو ينسحب ويرجع على مصر بعد ما إستعصى عليه غزو الشام، و ده اللى عمله فى 17 مايو 1799.
خساير نابوليون كانت كبيره قدام أسوار عكا إن إتقتل من جيشه عدد كبير من ظباطه وعساكره و قومنداناته اللى كان من ضمنهم بون وديتريهو ساى وكفاريللى اللى كان معروف فى مصر بإسم "أبو خشبه" إكمنه كان مركب رجل خشب مكان رجله الشمال.