نجيب ساويرس و ميكى ماوس
From Wikipedia, the free encyclopedia
نجيب ساويرس و ميكى ماوس هو موضوع عن رسم خيالى ظهر على صفحة نجيب ساويرس فى سايت التويتر بيصور ميكى ماوس بدقن و عقال و جلابيه و فى الأغلب ميمى بنقاب. الرسم هو و رسوم تانيه كان منتشر اصلاً فى كذا موقع على الانترنت و مش من اختراع ساويرس و بيتقال ان الرسم كان اتحط من مده على موقع سعودى بيعلن عن افتتاح ديزنى لاند فى السعوديه. فى 25 يونيه 2011 ممدوح اسماعيل محامى الجماعات الاسلامية فى مصر مع 14 محامى اتقدموا ببلاغ للنايب العام بإن ساويرس اساء للاسلام وطالبوا بالتحقيق مع ساويرس بحجة الاساءه و السخريه من هدوم بيعتبروها رموز اسلاميه. رغم ان الرسم ظهر من غير تعليق بيشير للاسلام لكن الإسلامويين اعتبروه تمثيل للاسلام مع انه ممكن مثلاً يكون بيمثل هدوم بدو صحارى و عربان. اللبس اللى اعتبروه اصحاب البلاغ اساءه للاسلام بيظهر فى رسومات و برامج تلفزيونيه كوميديه كتيره و حتى فى السعوديه نفسها زى فى برنامج "بينى وبينك". و من ناحيه تانيه الموضوع ممكن يطرح تساؤلات منطقيه فبطبيعة الحال اذا كانوا بيعتبروا الهدوم دى اسلاميه فليه الاعتراض على ظهورها فى رسم حتى ان كان اللى لابسينها شخصيات خياليه و اذا كانت الهدوم بتعتبر اساءه للاسلام فليه بيروجوا ليها.
نجيب ساويرس من ناحيته اعتذر و وضح انه ماقصدش اساءه لحد و شال الصوره من موقعه و قال إن كل الموضوع كان عباره عن كارتون شكله ظريف بعتهوله شخص فحطه على صفحته و ان المفروض عدم اختصار الاسلام فى نقاب و لحيه.
قبل كده فى 3 يونيه 2011 كان الإسلامويين اتقدموا ببلاغ ضد رسام الكاريكاتور مصطفى حسين بحجة إنه أساء للاسلام بسبب نشره رسم فى جورنال " أخبار اليوم " لواحد بدقن فى خلفية رسم كاريكاتورى. الاسلامويين بقوا بكده بيهاجموا كمان اللى بيتعرض لمواضيع زى الهدوم.
الشخصيه الخياليه ميكى ماوس كان اتعرض لأزمه قبل كده لما طالب اسلاموى بقتله و اتناولت الموضوع اجهزة الإعلام العالميه. الشيخ ده طالب فى برنامج تلفزيونى بقتل ميكي ماوس لأنه من فئة الفيران ويحل قتله فى الحل والحرم و ان الاسلام سمى الفار "فويسقة".