حجر رشيد
From Wikipedia, the free encyclopedia
Remove ads
حجر رشيد - بالفرنساوى: Pierre de Rosette ، بالانجليزى : Rosetta Stone - حجر لقاه عساكر نابوليون بونابارت فى رشيد فى مصر وقت الحمله الفرنسيه على مصر ، و أخده الإنجليز على لندن بعد ما إحتلوا اسكندريه سنة 1801، لكن لحسن الحظ الفرنساويين بعد ما لقوه عملوا منه نسخه بعتوها على باريس .[3] حجر رشيد كان منحوت عليه مرسوم تنصيب ملك مصر البطلمى بطليموس الخامس ابيفانس ( الظاهر ) ، بالهيروغليفى و الديموطيقى و اليونانى.
فى المرسوم اللى اتنقش على حجر رشيد اتوصف بطليموس الخامس بإنه : " ملك مصر العليا و مصر السفلى ، ابن الاله فيلابتور ، بموافقة بتاح ، اللى رع وهبه الانتصار ، تجسيد حى لأمون ، ابن رع ، بطليموس الخالد ، المحبوب من بتاح ، الاله الجواد ابيفانيس ". و من ضمن اللى اتكتب ان تمثال بطليموس الخامس ابيفانيس حا يتعبد فى كل معابد مصر و حا ينضم لكل تماثيل الهة مصر التانيه فى الاحتفالات الدينيه ، و إن المرسوم حا يتنقش على قواعد كل تماثيله فى نواحى مصر ، بالحروف المصريه المقدسه (الهيروغليفى) ، و الحروف المصريه الدارجه (الديموطيقى) ، و الحروف اليونانيه.
بعد شوية دراسات، العلما اللى عرفوا يقروا ويفهموا اليونانى قدروا يخمنوا إن التلت نصوص ليها معنى واحد، و إتصوروا ان مفتاح الهيروغليفى ومعاه تاريخ مصر محطوط على الحجر ده. العلما فى انجلترا و المانيا و ايطاليا وفرنسا كانو عملوا محاولات كتيره لفك الهيروغليفى المكتوب على حجر رشيد لكن كل المحاولات مانفعتش.
شامبوليون Jean-François Champollion اللى اتلقب بـ " المصرى " ، و هو عالم لغوى كبير نابغه فى عدد كبير من اللغات القديمه من ضمنها القبطى - و دى مع نباهته كات نقطة مهمه جداً - فهم على عكس الكل إن الهيروغليفى المصرى ده حروف صوتيه، وقدر من الإقتناع ده انه يبنى عليه و يمشى بصبر وطولة بال وشجاعه فى الإتجاه الصح. العلما التانيين كانو وصلو لنتيجه بتقول إن الديموطيقى المكتوب على حجر رشيد عباره عن حروف كتابه بس ما قدروش يتقدموا خطوه اكتر من كده فرفعوا الرايه واستسلموا. شامبوليون بشطارته اللغويه وعلمه فك حروف الهيرغليفى المصرى وادرك النظام اللغوى اللى فى نص حجر رشيد، وقدر يخلى النص يتقرى و يتفهم وكمان يتكتب ويتدرس. وبكده أسقط شامبوليون الفكرة الغلط اللى كات سايده عن الهيروغليفى المصرى اللى اسسها هورابولون [4] ، وفتح بوابة تاريخ مصر الحقيقى و انهى عصر تاريخ مصر الخرافى.
Remove ads
فهرس وملحوظات
مصادر
مواقع ليها علاقه بالموضوع
Wikiwand - on
Seamless Wikipedia browsing. On steroids.
Remove ads