ام المؤمنين
From Wikipedia, the free encyclopedia
ام المؤمنين لقب اتلقبت بيه زوجات النبى محمد صلى الله عليه و سلم. اتذكر اللقب ده فى القرآن فى سورة الاحزاب: {النَّبِيُّ أَوْلَى بِالْمُؤْمِنِينَ مِنْ أَنفُسِهِمْ وَأَزْوَاجُهُ أُمَّهَاتُهُمْ}(سورة الاحزاب: آية 6). اول زوجات النبى محمد كانت خديجة بنت خويلد و كانت مراته الوحيده و ماتجوزش عليها لمدة 28 سنه و بعد ما اتوفت اتجوز سودة بنت زمعة بعد ما عدى الخمسين و فى فترة 6 سنين اتجوز اكتر من 7 ستات و فى 7 سنين اتجوز 9 ستات. بعد سودة بنت زمعة اتجوز عائشة بنت ابو بكر و كانت عندها عشر او حداشر سنه و بعدها اتجوز حفصة بنت عمر بن الخطاب و بعدها زينب بنت خزيمة و بعدها ام سلمة بنت أبى امية بن المغيرة و بعدها اتجوز زينب بنت جحش اللى كانت مرات مولاه و ابنه بالتبنى زيد بن حارثة و اتطلقت منه عشان يقدر يتجوزها و نزل عليه الوحى بتشريع جديد يسمح بجواز الراجل من مطلقة ابن بالتبنى. اخر اللى اتجوزهم النبى محمد كانت ميمونة بنت الحارث. اغلب ستات النبى كانو ارامل قبل مايتجوزهم. الجوازات دى كانت فى العاده دوافعها عمل مصاهرات و تقارب بين القبايل لخلق حالة وئام بين المسلمين و القبايل زى ماكان بيحصل فى مجتمعات الجزيره العربيه اللى نظام الجواز الپوليجينى Polygyny ( تعدد الزوجات ) كان موجود فيها و حاجه عاديه. لغاية أواخر السنه التامنه الهجريه كان مسموح للرجاله بالجواز من أى عدد من الستات لكن نزلت أيه حددت العدد الأقصى للزوجات فى وقت واحد بأربعه و بشرط العدل: {وَاِنْ خِفْتُمْ أَلَّا تُقْسِطُوا فِى الْيَتَامَى فَانْكِحُوا مَا طَابَ لَكُمْ مِنَ النِّسَاءِ مَثْنَى وَثُلَاثَ وَرُبَاعَ فَاِنْ خِفْتُمْ أَلَّا تَعْدِلُوا فَوَاحِدَةً أَوْ مَا مَلَكَتْ أَيْمَانُكُمْ ذَلِكَ أَدْنَى أَلَّا تَعُولُوا} (سورة الستات: آية 3). قبل ماتنزل آية تحديد عدد الزوجات كان النبى محمد صلى الله عليه و سلم اتجوز كل الستات اللى اتجوزهم ، و نزلت الآية الكريمة: {وَلَنْ تَسْتَطِيعُوا أَنْ تَعْدِلُوا بَيْنَ النِّسَاءِ وَلَوْ حَرَصْتُمْ فَلَا تَمِيلُوا كُلَّ الْمَيْلِ فَتَذَرُوهَا كَالْمُعَلَّقَةِ وَاِنْ تُصْلِحُوا وَتَتَّقُوا فَاِنَّ اللَّهَ كَانَ غَفُور رَحِيم } ( سورة الستات: آية ١٢٩ ). من كل الستات بعد خديجه ماخلفش منهم غير ابراهيم من ماريه القبطيه و اتوفى و هو رضيع.
المؤرخ ابن الأثير نقل عن ابن الكلبى ان النبى محمد اتجوز 15 مره دخل بـ 13 منهم ، و جمع مابين 11 ، و اتوفى على 9.
- خديجه بنت خويلد
- سودة بنت زمعة
- عائشة بنت أبى بكر الصديق
- حفصة بنت عمر بن الخطاب
- زينب بنت خزيمة
- جويرية بنت الحارث
- ام حبيبة بنت أبى سفيان
- زينب بنت جحش
- صفية بنت حيى
- ميمونة بنت الحارث