Asunción

Asunción (en guaraní Paraguay)^[1] y de nome oficial Ciudad de Nuestra Señora Santa María de la Asunción^[2], ye la capital y ciudá más poblada del Paraguái. Ye un conceyu autónomu alministráu como distritu capital; poro, nun ta formalmente integráu en dengún de los departamentos del país. Allúgase a la vera la bahía d'Asunción, na oriella izquierda del ríu Paraguái, enfrente de la xuntura d'esti col ríu Pilcomayo. Fundada en 1537, ye una de les ciudaes más antigües de Sudamérica.

Asunción
Alministración
País	Paraguái
Distritu capital	Distrito Capital (es)
Tipu d'entidá	capital regional (es)
Nome oficial	Nuestra Señora Santa María de la Asunción (es)
Nome llocal	Nuestra Señora Santa María de la Asunción (es)
Códigu postal	1001–1925
Xeografía
Coordenaes	25°18′00″S 57°38′00″W
Asunción Asunción (Paraguái)
Superficie	117 km²
Altitú	43 m
Demografía
Población	462 241 hab. (2022)
Porcentaxe	100% de Distrito Capital (es)
Densidá	3950,78 hab/km²
Más información
Fundación	1537
Prefixu telefónicu	021
Llocalidaes hermaniaes	condáu de Miami-Dade, Rosario, Resistencia, São Paulo, Curitiba, Chiba, Puebla de Zaragoza, Trujillo, Chimbote, Medina de Pomar, Arxel, Taipéi, Madrid, Carrara, Ragusa (es) , Santu Domingu, La Plata, La Paz, Campinas (es) y Rio de Janeiro
asuncion.gov.py

La Direición General de Estadísticas, Encuestas y Censos (DGEEC), institutu estadísticu oficial de Paraguái, estima que nel 2016 la so población aproximao ye de 525.294 habitantes. El so área metropolitana, nomada Gran Asunción, abarca, arriendes de la capital, les ciudaes de Luque, Fernando de la Mora, San Lorenzo, Lambaré, Mariano Roque Alonso, Ñemby, Capiatá, Limpio, San Antonio, Villa Elisa ya Itauguá, que formen parte del Departamentu Central. El conxuntu de toes elles añade 2.198.662 habitantes a l'área metropolitana, que ye una de les 20 mayores d'América del Sur. La so superficie ye de 117 km² na ciudá, y 1029 km² nel Gran Asunción.

Asunción ye la sede de los trés poderes de la nación (executivu, llexislativu ya xuducial), el principal puertu fluvial del país y el so centru cultural. Pese a dellos altibaxos a lo llargo de la so historia Asunción ye, dende la so fundación hasta'l id de güei, el centru de l'actividá nacional. D'ella surden les iniciatives estatales, y nella concéntrense los bancos, les empreses, les asociaciones, les instalaciones culturales y les sedes diplomátiques foriates^[3].

Asunción ye considerada, nel Global Cities Index, como una ciudá global de categoría "Gamma -"^[4]. Ye una de les capitales más barates del mundu y una de les ciudaes más segures del continente, lo que ta permitiéndo-y garrar puxu nos caberos años y atraer inversores, mesmo na construcción que nos servicios^[5][6].

Referencies

1. Tocorre (ed.): «Fundación de Asunción – Paraguái ñemopu’â», artículu n'español y en guaraní. Consultáu'l 18 de xunetu de 2016.
2. Web de la Capital Americana de la Cultura
3. «Archived copy». Archiváu dende l'orixinal, el 2013-03-11.
4. A.T. Kearney Global Cities Index 2016
5. «New Zealand cities retain top spots in worldwide Quality of Living», artículu n'inglés (29 de payares de 2011) na web Scoop (Nueva Zelanda) que recueye los datos del informe anual de la consultora Mercer.
6. Noticia del diariu "La Nación" (5 de xunu de 2015) que recueye un artículu del The Financial Times que declara la ciudá como la más rentable pa invertir

• Datos: Q2933
• Multimedia: Asunción