Candidatura de Rio de Janeiro a los Xuegos Olímpicos de 2016
From Wikipedia, the free encyclopedia
La candidatura de Rio de Janeiro a los Xuegos Olímpicos y Paralímpicos de 2016 foi presentada oficialmente'l 7 de setiembre de 2007 cola unviada de la documentación esixida al Comité Olímpicu Internacional —COI—.[1][2] Una selmana dempués, l'organismu olímpicu reconoció a Rio como ciudá aspirante.[3] El 4 de xunu de 2008, mientres la sesta Convención del SportAccord,[Nota 1] celebrada n'Atenes, Grecia, la Comisión Executiva del COI refugó a Bakú, Doḥa y Praga y creó la llista de ciudaes candidates, compuesta per Rio, Chicago, Madrid y Tokiu.[4][5]
El 1 de setiembre de 2006, mientres el so asamble añal, el Comité Olímpicu Brasilanu —COB— escoyó a Rio de Janeiro como la so ciudá candidata pa entamar los Xuegos de la XXXI Olimpiada y los XV Xuegos Paralímpicos.[6] Esta foi la primer ocasión en que la ciudá llogró pasar a la fase de candidatura, en buscando en trés causes la sede d'unos Xuegos Olímpicos —1936, 2004 y 2012—.[7] El 14 de xineru de 2008, apurrióse l'Espediente de Solicitú al Grupu de Trabayu del COI,que, en analizándolo, calificó con 6,4 a la ciudá.[8][Nota 2]
El 11 de febreru de 2009, Rio de Janeiro presentó'l so Espediente de Candidatura.[9] La Comisión d'Evaluación llegó a la ciudá brasilana'l 27 d'abril col fin d'analizar l'espediente y evaluar la calidá de la candidatura.[10] Ente'l 29 d'abril y el 2 de mayu, la Comisión asistió a presentaciones téuniques y realizó inspeiciones en toles sedes esistentes, dando una evaluación favorable nel so informe final.[11][12] El llargu ya intensivu procesu de candidatura concluyó cola eleición de Rio como sede l'el 2 d'ochobre de 2009, mientres la 121ª Sesión del COI, celebrada en Copenḥague, Dinamarca.[13][14][15][16] Cola eleición, América del Sur recibió los Xuegos Olímpicos per primer vegada na hestoria.[17]
El proyeutu de Rio entamó entamar unos Xuegos con un costu de 14.4 mil millones de dólares, siendo capaz de realizar tolos eventos deportivos —sacante'l fútbol— dientro de la ciudá.[18][19] El proyeutu estableció cuatro zones olímpiques —Barra, Copacabana, Deodoro y Maracaná— amás de sedes pal golf y el rugby, deportes añadíos al programa olímpicu dempués de la eleición.[20][21][22] Tamién contempló, amás de Rio, a Belo Horizonte, Brasilia, Salvador de Bahia, São Paulo como la sedes del tornéu de fútbol.[23] Les feches propuestes van del 5 al 21 d'agostu pa los Xuegos Olímpicos y del 7 al 18 de setiembre pa los Paralímpicos.[24]