Congresu de los Estaos Xuníos
From Wikipedia, the free encyclopedia
El Congresu de los Estaos Xuníos ye'l órganu llexislativu del gobiernu federal de los Estaos Xuníos. Ye un parllamentu bicameral, formáu pola Cámara de Representantes y el Senáu; dambes cámares aconceyen nel Capitoliu de los Estaos Xuníos, en Washington DC. Neto los senadores que los representantes son elixíos en votación directa polos ciudadanos, magar que les vacantes del Senáu pueden cubrise por designación del respeutivu gobernador estatal. El Congresu tien un total de 535 miembros: 435 representantes y 100 senadores. La Cámara de Representantes tien, a mayores, seis miembros que representen a Puertu Ricu, Samoa Americana, Guam, les Islles Marianes del Norte, les Islles Vírxenes Americanes y el distritu de Columbia. Nun tienen derechu a votu nes sesiones plenaries, pero pueden asistir a elles, participar y votar nos comités del congresu y proponer lleis.
Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables. |
Congresu de los Estaos Xuníos | |
---|---|
United States Congress | |
Datos xenerales | |
Tipu | bicameralismu |
Estáu | Estaos Xuníos |
Parte de | Gobiernu Federal de los Estaos Xuníos |
Formáu por |
Cámara de Representantes de los Estaos Xuníos Senáu de los Estaos Xuníos |
Composición | |
Númberu d'escaños | 535 |
Más información | |
congress.gov | |
Los miembros de la Cámara de Representantes son escoyíos pa un periodu de dos años en votación directa nún distritu del congresu. Estos establécense a lo llargo'l país en función de la población a partir de los datos de la Oficina del Censu, cola única condición de que cada estáu tenga polo menos un representante nel Congresu. No que cinca al Senáu, cada estáu, con independencia del so tamañu o población, escueye a dos senadores. Estos son escoyíos en cada estáu pa un mandatu de 6 años, y nun s'escueyen toos al tiempu: cada dos años renuévase un terciu del Senáu. Pa ser escoyíu como congresista hai que tener polo menos 25 años pa ser representante y 30 pa ser senador, hai que vivir nel estáu al que se intenta representar y hai que tener sío ciudadanu d'Estaos Xuníos polo menos 7 años pa ser representante y 9 pa ser senador.
El Congresu, creáu pola Consitución de los Estaos Xuníos, aconceyó por primer vegada en 1789, sustituyendo nes sos funciones llexislativas al Congresu de la Confederación. Magar que nun ye obligatoriu, na práctica, dende'l sieglu XIX, los miembros del Congresu pertenecen al Partíu Republicanu o al Partíu Demócrata, y ye perraru que pertenezcan a otru partíu estremáu o seyan independientes.
L'Artículu Primeru de la Constitución d'Estaos Xuníos establez que tolos poderes llexislativos del gobiernu federal recaen nel Congresu. Estos inclúin l'autoridá pa regular el comerciu interestatal ya internacional, la d'ellaborar lleis, la de crear cortes federales de rangu inferior al Tribunal Supremu, la de mantener les Fuercies Armaes y la de declarar la guerra. La Constitución inclúi amás una cláusula necesaria que-y da al Congresu'l poder de "faer toles lleis necesaries y mesmes pa executar poderes futuros"; ye la nomada Claúsula Elástica, que permite adaptar les competencies del Congresu a les nueves tecnoloxíes (enerxía nuclear, aviación, ciberespaciu).
El Senáu ye cuasi totalmente igual a la Cámara de Representantes en poder, y nun ye una "cámara de revisión" como les cámares altes de parllamentos bicamerales n'otros países. Sicasí, hai competencies esclusives de cada cámara: solamente'l Senáu puede aprobar o refugar a les persones designaes pol Presidente pa puestos nel poder executivo y xudicial. Tamién puede ratificar trataos, ente que les lleis rellacionaes colos impuestos tienen d'aniciase na Cámara al ser más representativa que'l Senáu.