Cromatóforu
From Wikipedia, the free encyclopedia
Los cromatóforos son célules con pigmentos nel so interior que reflexen la lluz. Pueden atopase en diversos seres vivos como los anfibios, los peces, ciertos crustáceos y dalgunos cefalópodos. Son los principales responsables de la coloración de la piel, del color de los güeyos nos animales ectotermos y de la formación de la cresta neural a lo llargo del desenvolvimientu embrionariu. Los cromatóforos yá maduros pueden estremase en distintes clases según el color que reflexen so una lluz blanco: cianóforos (azul), eritróforos (colloráu), iridóforos (iridiscente), leucóforos (blancu), melanóforos (negru/marrón) y xantóforos (mariellu). El términu tamién puede faer referencia a les visícules coloriaes asociaes a la membrana de ciertes bacteries fotosintétiques.
Delles especies pueden camudar de color rápido per mediu de mecanismos que camuden un pigmentu por otru y reorienten la superficie reflectora de los cromatóforos. Esti procesu, de cutiu utilizáu como mecanismu de camuflaje, ye llamáu mimetismu o cambéu fisiolóxicu de color. Dellos cefalópodos como los pulpos, presenten unos órganos cromatóforos realmente complexos, controlaos por músculos, ente que ciertos vertebraos, como'l camaleón, producen efeutos similares mediaos nesti casu per víes de señalización celular. Estes señales pueden ser hormones o neurotransmisores y pueden ser inducíes por cambeos nel humor, la temperatura, el estrés o cambeos notables del ambiente a nivel llocal.
A diferencia de los animales ectotermos, los mamíferos y los páxaros presenten namái una clase de célules del tipu de los cromatóforos: los melanocitos. L'equivalente nos animales ectotermos, los melanóforos, son estudiaos anguaño nos llaboratorios d'investigación col fin d'ayudar na comprensión de ciertes enfermedaes humanes y utilizaos como ferramienta nel descubrimientu o diseñu de nuevos fármacos.