Discutiniu en redol a la llinia d'alta tensión Sama-Velilla
From Wikipedia, the free encyclopedia
La discutiniu en redol a la llinia d'alta tensión Sama-Velilla fai referencia a la oposición que surdió nes provincies españoles d'Asturies, Lleón y Palencia en contra del proyeutu de Rede Llétrica d'España de construyir una llinia d'alta tensión ente los conceyos de Llangréu (Asturies) y Velilla del Ríu Carrión (Palencia) travesando la Cordal Cantábricu.
Dichu proyeutu, en desenvolvimientu dende diba dos décades, plantegaba un doble circuitu de 400 kV que coneutaría les centrales térmiques de Lada y Velilla, escurriendo mientres cuasi 124 quilómetros por un total de 19 conceyos.[1] La razón de la llinia venía dada pola necesidá de sacupar los escedentes enerxéticos fora d'Asturies, pos a los entós esistentes xuniríense diversos proyeutos de xeneración entamaos pa los siguientes años, y los dos llinies esistentes resultaben insuficientes.[2]
Sicasí, dende la so publicación y esposición pública en 2007, la oposición al mesmu nun dexó de crecer y afectó tanto a movimientos ciudadanos, corporaciones municipales, grupos ecoloxistes y partíos políticos. Asina, la totalidá de conceyos que traviesa la llinia, les Cortes de Castiella y Lleón, la Diputación de Lleón y PP ya IX d'Asturies amosaron el so refugu a la mesma.[3][4][5] Nel llau opuestu taba'l gobierno asturianu, que xunto col Ministeriu d'Industria y REE, defendieron la construcción del tendíu llétricu.[6][2]
Ente les aiciones llevaes a cabu polos opositores tuvieron llugar delles manifestaciones, tantu n'Asturies como en Lleón, la comparecencia ante la Comisión Europea[7] y la presentación de 27.000 allegamientos al proyeutu, qu'una vegada refugaes por REE, dieron pasu al entamu del procesu xudicial, que yá consiguió anular el proyeutu en 2003.[8][9] Tres años d'oposición y polémica, el 10 de payares de 2017 anuncióse'l zarru de les centrales térmiques de Sama y Velilla del Ríu Carrión polo que'l proyeutu, que xuniría dambes, perdía la so razón de ser.[10][11]