Egagrópila
From Wikipedia, the free encyclopedia
Les egagrópiles (conocíes en cetrería tamién como plumada, pelota o egregófito, por influx del idioma portugués) son boles formaes por restos d'alimentos ensin dixerir que regolden munches aves. Entiéndise por regoldaar al actu d'espulsar pela boca, ensin l'esfuerzu nin los sacudiones de la emesis, dellos conteníos sólidos o líquidos del tubu dixestivu. El conteníu de cada egagrópila asina espulsada depende de la dieta de l'ave, pero de normal contienen güesos, piel, pelambre, exoesqueletos d'inseutos, materia vexetal indixerible por escesu de celulosa, plumes, uñes y dientes, que les aves nun pueden dixerir.[1] Son bien útiles n'ornitoloxía pa saber el tipu d'alimentación qu'estes lleven y n'ecoloxía pa conocer les rellaciones de predación. Suelen ser bien normales ente uxos, curuxes, utres y otres rapiegues.
Polo xeneral, les egagrópiles difieren ente especies y estes pueden de cutiu discernise pola observación del material regoldao. Por casu, les de la curuxa (Tyto alba) son arredondiaes, escures y tienen un ciertu rellumu na superficie, ente que les del gárabu (Strix aluco) son menos compactes y más abuxaes.
El nome provién del llatín científicu aegagropila, acuñáu a partir del griegu antiguu αἴγαγρος (aígagros), "cabra montesa" (denomada tamién "montesa"), y pila, "pelota", términu esti quiciabes venceyáu al llatín pilus -"pelo"- pola referencia a una regurxitación superficialmente similar qu'asocede nel ganáu. N'efeutu, esa regoldación pecuaria inclúi a los vulgarmente llamaos "empaches de güe" y la caprina piedra bezoar, esta un famosísimo ingrediente de la farmacopea antigua y medieval usáu como contraveneno (dacuando eficaz contra l'arsénicu) y dacuando tan bellu que-y la consideraba piedra semipreciosa. Eses mases regoldaes, que coles mesmes se ven n'humanos qu'inxeren el so pelo (tricofaxia), difieren de les egagrópilas aviares en qu'aquelles tán constituyíes per pelo inxeríu al llambese los semovientes a sigo mesmos y mutuamente, pelo tremáu con réfugos vexetales y dacuando tierra o caliares del suelu; y en que tales mases "tienen un golor sele arumoso, y cuando se les toca cola llingua producen cierta astricción".[2]