L'Imperiu de Romania (en llatín: Imperium Romaniae), nomáu davezu na historiografía como Imperiu llatín (en griegu: Λατινική Αυτοκρατορία) o Imperiu llatín de Constantinopla, foi un estáu feudal fundáu polos cabezaleros de la Cuarta Cruzada en tierres que-y quitaran al Imperiu bizantín. Foi establecíu tres de la conquista de Constantinopla en 1204, y duró hasta 1261. L'imperiu surdió cola idea de sustituyir al imperiu romanu bizantín como socesor verdaderu del Imperiu romanu nel este, con un emperador católicu en vez del ortodoxu que dirixía l'Imperiu bizantín. Baldwin IX, conde de Flandes, foi coronáu como'l primer emperador llatín, col nome de Baldwin I, el 16 de mayu de 1204. L'Imperiu llatín fracasó nel so intentu d'algamar la primacía ente los diversos estaos llatinos que s'establecieran d'aquella en tierras que foran bizantines, y dempués d'un periodu inicial d'ésitos militares bien ceo entamó a declinar. Debilitáu poles lluches continues colos búlgaros y colos bizantinos, foi ocupáu por estos últimos, dirixíos pol emperador Miguel VIII Paleólogu, en 1261. El so caberu emperador, Baldwin II, coló pal exiliu, y magar que l'imperiu desapaeció el títulu imperial sobrevivió, con varios candidatos a elli, hasta'l sieglu XIV.