Misión diplomática

Una misión diplomática ye'l conxuntu o delegación de persones llegalmente acreditaes por un estáu pa que lu representen énte otru. Na práutica, el términu emplégase d'avezu pa denomar a la misión permanente, ye dicir, la oficina los representantes diplomáticos d'un país na ciudá capital d'otru. Acordies col Drechu Internacional, les miosioens diplomátiques gocien d'estatus estraterritorial, poro, magar que tean nel territoriu del estáu anfitrión, nun tán vinculaes a les lleis llocales y, cásique en toles situaciones son trataes como parte'l territoriu del país al que representen.

Embaxada

Embaxada d'Alemaña n'Ottawa, Canadá

A una misión diplomática permanente llámasela embaxada y quien ta'l frente la misión conózselu como embaxador. Les misiones nes Ñaciones Xuníes son conocíes cenciellamente como misiones de calter permanente y el direutor de les mesmes ye a un tiempu representante permanente y embaxador. Dellos países dan nomes estreamaos a les sos misiones y al personal de les mesmes: Asina, una misión del Vaticanu ye dirixía pol nunciu apostólicu (o nunciu papal) y llámase nunciatura apostólica; demientres que les libies denómense axencies populares y los xefes de misión, secretarios.

Históricamente, cuando una misión diplomática taba liderada por un oficial de rangu secundariu (p. ex. un unviáu o ministru residente) yera conocía col nome de delegación. Sicasí, dambos cargos tán obsoletos güei.

Nos casos nos que la situación itnerñacional seya de confliutu o de calter prebélicu, los países acostumen a retirar al xefe de la misión del estáu anfitrión p'amosar descontentu. Esto ye menos drásticu que pesllar dafechu les rellaciones diplomátiques y la misión pue siguir funcionando de xeitu regular, maga que tea liderada por un chargé d'affaires (Encargáu de Ñegocios) que tien poder llimitáu. Faise notar que, durante'l periodu de socesión ente dos xefes de misión, un chargé d'affaires a.i. (Ad Interim) pue ser nomáu cuidador con calter temporal; esto nun implica denguna hostilidá p'haza'l país anfitrión.

El consuláu ye tamién una oficina diplomática, pero'l so ámbitu d'aición estrémase del de la embaxada, yá que tien por xera la defensa de los ñacionales del so país, facer poderes, documentación al día y dellos asuntos d'interés de los ñacionales del so país, comu lu define la Convención de Viena sobro les rellaciones consulares de 1963.

• Wikimedia Commons acueye conteníu multimedia sobre Embajadas.

Téunicamente, el tréminu "embaxada" refierse al personal que trabaya na misión, demientres que la oficina conozse como "cancillería", magar qu'esta distinción nun se suel emplegar públicamente pa nun inducir a enquívocos.

Xera

El llabor d'una misión diplomática ye'l de protexer los intereses del estáu acreditante nel estáu receutor dientro los llímites del drechu internacional; ñegociar col gobierno del estáu anfitrión lo que l'emisor quier, enterase, pela vía llegal, de les condiciones y desendolcos del estáu receutor y unvialos al gobiernu del estáu acreditante; promover les rellacioens candiales ente dambos estaos y fomentar el so espoxigue económicu, cultural y científicu.

Los derechos y esenciones (como la inmunidá diplomática) d'estes misiones tán asentaos na Convención de Viena sobro les rellaciones Diplomátiques (1961).