Patriarcáu
From Wikipedia, the free encyclopedia
Patriarcáu ye una forma d'organización social en que l'autoridá ye exercida por un varón xefe de cada familia, denomináu «patriarca». L'autoridá del patriarca puede estendese a los parientes alloñaos del mesmu llinaxe. El conceutu puede estendese a toles organizaciones sociales nes qu'esiste un desequilibriu de poder ente varones y muyeres, en favor de los primeres.[1]
Nos estudios feministes y dellos estudios sociolóxicos, históricos, políticos y psicolóxicos, el términu patriarcáu ye utilizáu pa describir una situación de distribución desigual del poder ente homes y muyeres na que los varones tienen preeminencia n'unu o dellos aspeutos, tales como la prohibición del derechu al sufraxu, la regulación de los delitos contra la llibertá sexual, la violencia de xéneru, los rexímenes de custodia llegal de los fíos, la doble moral según el xéneru, el sexismu nel llinguaxe, mecanismos d'invisibilización, la determinación de les llinies de descendencia (filiación puramente por descendencia patrilineal y portación del apellíu paternu), los derechos de primogenitura, l'autonomía personal nes rellaciones sociales, la participación nel espaciu públicu ―políticu o relixosu― o l'atribución de estatus a les distintes ocupaciones d'homes y muyeres determinaes pola división sexual del trabayu.[ensin referencies]