Telecomunicación
From Wikipedia, the free encyclopedia
La telecomunicación (del prefixu griegu tele, "distancia" o "lloñe", "comunicación a distancia") ye una téunica consistente en tresmitir un mensax dende un puntu a otru, davezu col atributu típicu adicional de ser bidireicional. El términu telecomunicación cubre toles formes de comunicación a distancia, incluyendo radio, telegrafía, televisión, telefonía, tresmisión de datos ya interconexón d'ordenadores a nivel d'enllaz. El Día Mundial de la Telecomunicación celébrase'l 17 de mayu.
La base matemática sobre la que se desenvuelven les telecomunicaciones foi desendolcada pol físicu escocés James Clerk Maxwell. Maxwell, nel prefaciu de la so obra Treatise on Electricity and Magnetism (1873), declaró que'l so principal llabor consistía en xustificar matemáticamente conceutos físicos descritos hasta esi momentu de forma únicamente cualitativa, como les lleis de la inducción electromagnética y de los campos de fuercia, mentaes por Michael Faraday. Con esti envís, inxirió'l conceutu d'onda electromagnética, que permite una descripción matemática afayadiza de la interacción ente electricidá y magnetismu per aciu de les sos afamaes ecuaciones que describen y cuantifiquen los campos de fuercies. Maxwell albidró que yera posible espardir ondes pel espaciu llibre utilizando descargues eléctriques, fechu que corroboró Heinrich Hertz en 1887, ocho años dempués de la muerte de Maxwell, y que, más sero, supunxo l'entamu de la era de la comunicación rápida a distancia. Hertz desendolcó'l primer tresmisor de radio xenerando radiofrecuencies ente 31 MHz y 1.25 GHz.