Baxu alemán

El nome Baxu alemán (en baxu alemán: Plattdütsch, Plattdütsk, Plautdietsch, Nedderdütsch, etc y n'altu alemán: Plattdeutsch o Niederdeutsch) designa les variedaes llingüístiques o llingües de la rama xermánica occidental desendolcaos dende'l antiguu saxón que se falen nel oeste de los Países Baxos y el norte d'Alemaña. Tamién les variedaes baxofránciques de Niederrhein, los Países Baxos y Flandes yeren consideraos orixinalmente baxu alemán. Ye importante nun lu confundir con baxu saxón, que son les variedaes occidentales del baxu alemán

Baxu alemán Plattdütsch, Plattdütsk
Faláu en	Alemaña
Rexón	Norte d'Alemaña y zones baxes del Rin
Falantes • Nativos: • Otros:	~1.000.000 • 640.000[1] • 1.000.000[2]
Familia	Llingües indoeuropees   Xermánicu   Xermánicu occidental    Baxu alemán
Alfabetu	Llatín
Estatus oficial
Oficial en	Nengún país
Reguláu por	Nun ta reguláu
Códigos
ISO 639-1	nengún
ISO 639-2	nds
ISO 639-3
Estensión del baxu alemán

Historia

Los saxones espardiéronse coles invasiones bárbares pal sur, suroeste ya Inglaterra llevando con ellos la so llingua. Beda Venerabilis llamó a los saxones que quedaren nel continente Antiguos saxones, del cual vien el nome Antiguu saxón pa les etapes tempranes de la llingua baxu alemana. Esta llingua espardióse peles actuales rexones de Holstein, Stormarn, Baxa Saxonia, Börde, Harz, Westfalia y la parte oriental de los Países Baxos. Sicasí, en Wendland hubo per sieglos una zona onde s'amestaron eslavos y saxones.

Los dialeutos anglosaxones y el inglés antiguu tienen un gran númeru de coincidencies col baxu alemán ya que los pueblos xermánicos que invadieron Gran Bretaña teníen orixe nel norte d'Alemaña. Esta llingua anglosaxona xebró abondo del baxu alemán poles influyencies daneses y noruegues de los viquingos, la influyencia del francés normandu que s'impunxo y la erosión de la gramática inglesa na Edá Media.

Col entamu de la Ostsiedlung (Colonizaciones facia l'este) espardióse l'antiguu baxu alemán pal este tanto en rexones de l'Alemaña oriental y Polonia como en ciudaes báltiques y escandinaves. Amás sustituyó dialeutos daneses nel norte y frisones en Frisia oriental. Estes nueves variedaes amuesen carauterístiques especiales como la nueva desinencia del plural de los verbos que na zona occidental ye -(e)t (wi maakt, ji maakt, se maakt) y na oriental en -en (wi maken, ji maken, se maken).

El baxu alemán foi primero una llingua d'escritura importante utilizada xunto col llatín en documentos y testos llexislativos. Hubo importantes testos teolóxicos (biblies como la Kölner Bibel o la Lübecker Bibel.

L'Hansa dominada por Lübeck tuvo el baxu alemán como llingua de comunicación que sirvió como llingua franca de los mares del norte y este. Esta dómina de la llingua denomínase Baxu alemán mediu (Mittelniederdeutsch) aproximao ente los años 1200 y 1600.

Col pasu del tiempu l'altu alemán foi sustituyendo al baxu alemán como llingua d'escritura y rebaxóla a nivel dialeutal. Al rodiu de los sieglos XVI y XVII les cancilleríes foron pasándose al altu alemán na escritura pese a que la población siguiera utilizando nel so día a día'l baxu alemán. Más alantre l'altu alemán entraría poco a poco nes capes de la sociedá hasta que l'antigua llingua de la rexón pasara a convertise en llingua oral de les persones de clase baxa, especialmente de la xente de campu.

Los procesos sociales de los sieglos IXX y XX amenazaron la existencia de la llingua baxu alemana, lo cual aumentó cola industrialziación y urbanización hasta que finalmente la burocratización de la vida y la obligatoriedá d'asistir a les escueles (onde la llingua d'enseñu yera l'altu alemán) xunto colos medios de mases n'altu alemán fixeron que la sociedá pasase del baxu a l'altu alemán como llingua de comunidá.

Finalmente nel sieglu XX tres la Segunda Guerra Mundial entamó una serie de movimientos migratorios de xente d'otres árees llingüístiques, lo cual dificultó el caltenimientu de la llingua baxu alemana.

División dialeutal

Dialeutos n'Alemaña

• Baxu alemán occidental o Baxu saxón^[3]
  • Baxu saxón del norte
    • Schleswig
    • Holstein
  • Frisón oriental
  • Westfalianu
  • Ostfalianu

• Baxu alemán oriental
  • Märkisch
  • Mecklemburgu-Pomerania occidental
  • Pomeranu oriental
  • Baxu prusianu
    • Plautdietsch

Nes mayores ciudaes del norte d'Alemaña coexisten dialeutos baxu alemanes y dialeutos altu alemanes como l'altu alemán d'Hamburgu o l'alemán del Ruhr que se desendolcaran nos sieglos IXX y XX y nun cuenten como baxu alemán. Sicasí, estos dialeutos amuesen un sustratu baxu alemán en dalgunes carauterístiques llingüístiques, léxicu, sintaxis o entonación.

Dialeutos nos Países Baxos

• Westerkwartiers
• Gronings
• Stellingwerfs
• Midden-Drents
• Zuid-Drents
• Twents
• Twents-Graafschaps
• Gelders-Overijssels
• Veluws

Otros países

• Plautidetsch

Mecedures de baxu alemán y altu alemán

• Missingsch
• Petuh
• Kollumerpomsters

Fonoloxía histórica

L'altu alemán surde na edá media a partir de la segunda mutación consonántica, que nun tuvo llugar en toles llingües xermániques, como ye'l casu del baxu alemán. Poro, el baxu alemán aseméyase de munchos xeitos al neerlandés, inglés, frisón, suecu, noruegu, islandés o danés, por exemplu:

Baxu alemán	Neerlandés	Inglés	Frisón de Saterland	Frisón del Norte	Suecu	Noruegu	Islandés	Altu alemán	Asturianu
Water	water	water	woater	weeder (Fering/Öömrang)	vatten	vann	vatn	Wasser	Agua
Vad(d)er	vader	father	foar	faader (Sölring)	far	far	faðir	Vater	Padre
Pann(e)	pan	pan	ponne	poon (Fering/Öömrang)	panna	panne	panna	Pfanne	Sartén
Solt	zout	salt	soalt	saalt (Fering/Öömrang)	salt	salt	salt	Salz	Sal
Melk	melk	milk	molk	moolk (Fering/Öömrang)	mjölk	melk	mjólk	Milch	Lleche
Kopp	kop	cup	kop	kop (Fering/Öömrang)	kopp	kopp	bolli	Tasse	Taza

En dalgunos dialeutos occidentales la g pronúnciase como en neerlandés, esto ye, como [x] (mesmu soníu que la ch en noch o machen n'aleman estándar, la ḥ de l'asturianu en guaḥe o la j del castellán en cojo)

Comparación de consonantes baxoalemanes y altoalemanes

nd. = baxu alemán, nl. = neerlandés, hdt. = altu alemán, engl. = inglés k → ch:

nd. nl. ik ↔ hdt. ich (yo)

nd. kaken, koken, nl. koken ↔ hdt. kochen (cocinar)

nd. nl. maken, engl. make ↔ hdt. machen (facer)

d → t:

nd. nl. dag, engl. day ↔ hdt. Tag (día)

sicasí d → d: (cf. th inglesa)

nd. dat, Doorn, nl. dat, doorn (engl. that, thorn) ↔ hdt. das, Dorn (eso, espina)

t → s:

nd. nl. dat, wat, eten, engl. that, what, eat ↔ hdt. das, was, essen (eso, qué, comer)

t → z:

nd. Tied, Timmer, nl. tijd, mdartl. timmer, engl. tide, timber ↔ hdt. Zeit, Zimmer (tiempu, habitación)

t → tz:

nd. sitten, nl. zitten, engl. sit ↔ hdt. sitzen (tar sentáu)

p → f:

nd. slapen, slopen, nl. slapen, engl. sleep ↔ hdt. schlafen (dormir)

nd. Schipp, nl. schip, engl. ship ↔ hdt. Schiff (barcu)

p → pf:

nd. Peper, nl. peper, engl. pepper ↔ hdt. Pfeffer (pimienta)

v, w, f → b:

nd. Wief, Wiewer, nl. wijf, wijven, engl. wife, wives ↔ hdt. Weib, Weiber (muyer, esposa)

nd. leev, leewer, nl. antiguu inglés; lief ↔ hdt. lieb, lieber (caru, queríu)

Otres

westnd. = baxu alemán occidental

s → sch:

sl → schl:

westnd. slapen → hdt. schlafen (dormir)

sm → schm:

westnd. smeren, Smeer → hdt. schmieren, Schmiere (untar, untura)

sp → schp:

westnd. spitz, spiss → ostnd. hdt. spitz (pronunciao "xpits") (punta)

st → scht:

westnd. Steen → hdt. Stein (pronunciao "xtain") (piedra)

sw → schw:

westnd. Swien → hdt. Schwein (gochu)

Regla ortográfica

Nun existe nenguna ortografía unitaria pal baxoalemán, los llingüistes utilicen habitualmente una transcripción fonética, esto ye, una escritura que representa los soníos lo más fielmente posible. Poro, munchos testos son difíciles de lleer pa la xente.

La ortografía más emplegada ye la de Johannes Saß, ("Kleines plattdeutsches Wörterbuch. Nebst Regeln für die plattdeutsche Rechtschreibung", Hamburgu 1972). Sofítase na ortografía del altoalemán y remarca les anomalíes. Magar ello esta ortografía nun ye vinculante nin abarca tol territoriu y permite una gran variedá. Asina esta escritura utilízase sobre too pa los dialeutos del norte. Por exemplu pal westfalianu nun encaxa a causa de los sos diptongos.

Pal baxoalemán oriental nun hai regles d'escritura pero hai una convención del sieglu XIX qu'utilicen los lexicógrafos modernos de Mecklemburgu-Pomerania occidental. Estrémase de les regles de Saß sobre too pola falta de duplicación de vocales, del dígrafu <ie> pa la vocal /i:/ y otros símbolos especiales (Æ/æ bzw. Œ/œ, Å/å, Ę/ę), que nun s'afayen nes fales baxosaxones.

Gramática

Nun existe una gramática unitaria, tomamos como exemplu la gramática recoyida por Wolfgang Lindow probablemente propia del área del norte de la Baxa Saxonia.^[4]:

Xéneros

Los sustantivos tienen tres xéneros como n'altoalemán:

• de Mann (cf. hd. „der Mann“), Akkusativ: den Mann (l'home)
• de Fru (cf. hd. „die Frau“), Akkusativ: de Fru (la muyer)
• dat Kind (cf. hd. „das Kind“), Akkusativ: dat Kind (el nenu)

Nun siempres correspuéndense los xéneros del baxoalemán colos de l'altoalemán.

Dativu, acusativu o oxetivu

Fálase davezu d'una caída del casu de suxetu (nominativu) y del oxetivu (acusativu). El dativu paez fusionase col acusativu y el xenitivu descríbese con usos de preposiciones.

Xenitivu

El xenitivu constrúise cola partícula postclítica -(e)s y l'artículu "des". Cola cayida del baxoalemán tres el Renacimientu estinguióse esti casu. Namás pue atopase en delles construcciones, sobre too les de les partes del día.

• Tüügs maken - lliteralmente "facer del cosu", pa describir tonteríes. cf. hd. Zeug
• eens Dags - un día. cf. hd. eines Tages
• 's Morrns - pela mañana. cf. hd. des Morgens
• 's Nachts - pela nueche. cf. hd. des Nachts

La construcción de posesivu típica del xenitivu ye sustituida por una cosntrucción de dativu y un pronome posesivu. Por exemplu:

• Den Fischer siene Fru (La muyer del pescador) cf. hd. Dem Fischer seine Frau (lliteral: Al pescador so muyer)
• De Fru vun den Fischer cf. hd. Die Frau von dem Fischer (lliteral: La muyer del pescador)

Antiguamente usábase'l xenitivu en llugar del dativu pa la primera construcción. Des Fischer siene Fru^[5]

Plural

El plural, igual que n'altoalemán, constrúise de diversos xeitos:

Desinencia	Singular	Plural	Altoalemán	Asturianu
Umlaut	dat Huus	de Hüüs	das Haus, die Häuser	la casa, les cases
Allargamientu de vocal	de Dag	de Daag(/e/n)	der Tag, die Tage	el día, los díes
Terminación en -(e)n	de Disch	de Dischen	der Tisch, die Tische	la mesa, les meses
Terminación en -er	dat Kleed	de Kleder	das Kleid, die Kleider	el vistíu, los vistíos
Terminación en -er con Umlaut	dat Book	de Böker	das Buch, die Bücher	el llibru, los llibros
Terminación -s	de Arm	de Arms	der Arm, die Arme	el brazu, los brazos
Sin cambeos	de Fisch	de Fisch	der Fisch, die Fische	el pexe, los pexes
irregulares	de Mann	de Mannslüd (tamién de Manns)	der Mann, die Männer	l'home, los homes (lliteral "xente d'home")

Pronomes

Pronomes personales

Númberu	Persona	Xéneru	Nominativu	Acusativu	Acusativu (Frisia oriental)	Acusativu (Ostfalia)
Singular	1.		ik	mi	mi	mik
	2.		du	di	di	dik
	3.	Masculín	he(i)	em/sik	hum	ö(h)ne
		Feminín	se(i)	ehr/sik	höhr/höör	se(i)
		Neutru	dat/et	dat/sik		et
Plural	1.		wi	u(n)s	uns	üsch
	2.		ji, (j)it (südwestf.)[6]	ju, juch,[7][8] (verschriftlicht auch als jug),[9][10] ji, ink (südwestf.)[11]	jo	jehre
	3.		se	jem/jüm/ehr/se(i)	höhr	sik

Pronomes posesivos

Númberu	Persona	Xéneru	Nominativu (Un poseyedor)	Acusativu (Un poseyedor)	Nominativu (Dellos poseyedores)	Acusativu (Dellos poseyedores)
Singular	1.		mien	mien(en)	mien	mien
	2.		dien	dien(en)	dien	dien
	3.	Masculín	sien	sien(en)	sien	sien
		Femenín	ehr	ehr(en)	ehr	ehr
Plural	1.		u(n)s	u(n)s(en)	u(n)s	u(n)s
	2.		ju(un), jug(e/n)[9]	ju(un), jug(e/n)	juun	juun
	3.		(jem-)ehr	(jem-)ehr(en)	(jem-)ehr	(jem-)ehr

Axetivos

Declínense igual que n'alemán estándar, cola pecularidá de que la raíz de nominativu/acusativu del neutru puede ser -es o -et

Conxugación verbal

Los verbos distinguen dos tiempos, presente y pretéritu, y dos modos, indicativu y suxuntivu. La desinencia de plural ye única pa toles persones. Ésta ye al oeste del ríu Elba -(e)t y al este d'ésti -(e)n

El baxoalemán namás conoz un participiu, el participiu perfeutu (Partizip II en alemán estándar), mientres que'l Partizip I de l'alemán estándar nun esiste nesta llingua, nel so llugar utilízase una forma de xerundiu que tamién ye mui usual nel alemán estándar coloquial, el xerundiu renanu:

• Baxoalemán: Ik bün an't maken
• Neerlandés: Ik ben aan het maken
• Alemán coloquial: Ich bin am machen
• Alemán estándar: Ich mache
• Alemán con Partizip I (usu lliterariu): Ich bin machend
• Inglés: I'm making
• Asturianu: Toi faciendo

Pretéritu

Constrúise como n'alemán estándar utilizando'l verbu auxiliar hebben.

Futuru

Futuru col modal sölen/schölen/zullen/sallen/schaelen, "deber". cf. hd. sollen.

• Ik schal na School gahn lliteral He dir a la escuela, puede significar tanto "he dir" como "diré". cf. hd. Ich soll zur Schule gehen

Futuru col verbu waarn, "llegar a ser". cf. hd. werden. Usu habitual nel alemán estándar

• Ik waar morgen to School gahn cf. hd. Ich werde morgen zur Schule gehen

Simplemente con alverbios temporales que yá falen del futuru puede utilizase una forma verbal de presente, como n'alemán estándar.

• Ik gah morgen na School to cf. hd. Ich gehe morgen zur Schule. (Mañana voi a la escuela)

Prefixu ge-

Esti prefixu utilízase en dellos dialeutos pa formar los participios perfectos, como n'alemán estándar, mientres que n'otros dialeutos nun apaez. Les razones nun tan nidies entá. N'ostfalianu'l prefixu ge- pasa incluso a e-.

Dellos poetes y escritores en baxoalemán

• Oswald Andrae
• Hermann Bärthel
• Korl Biegemann
• Hein Bredendiek
• John Brinckman
• Reimer Bull
• Ewald Christophers
• Heinrich Deiters
• Johannes Diermissen
• Georg Droste
• Arnold Dyck
• Reuben Epp
• Johann Hinrich Fehrs
• Gorch Fock (Johann Wilhelm Kinau)
• Klaus Groth
• August Hinrichs
• Moritz Jahn
• Rudolf Kinau
• Christine Koch
• Jürgen Kropp
• Hinrich Kruse
• Albert Mähl
• Joachim Mähl
• Eli Marcus
• Friedrich Ernst Peters
• Fritz Reuter
• Walter Rothenburg
• Heinrich Schacht
• Jochen Schimmang
• Ernst-Otto Schlöpke
• Heinrich Schmidt-Barrien
• Martin Selber
• Wilhelmine Siefkes
• Wolfgang Sieg
• Julius Stinde
• Rudolf Tarnow
• Jack Thiessen
• Augustin Wibbelt
• Alwine Wuthenow