Biblia

La Biblia (del llatín tardíu biblĭa, y esti del griegu βιβλία) ye un llibru sagráu de diverses relixones del mundu. El términu biblia quier dicir llibros en griegu, pol fechu de qu'esti llibru en realidá ye una coleición d'escritos más pequeños que varia de relixón en relixón. Asina por exemplu, la biblia xudía, tamién conocida como Tanak, tien 39 llibros, toos ellos formen parte de lo que los cristianos llamen Vieyu Testamentu. Les biblies cristianes tamién son estremaes yá qu'en cuasi toles ilesies el númberu de llibros total ye de 66, distribuyíos ente'l Vieyu Testamentu y el Nuevu Testamentu, sacante na católica y les versiones de les Ilesies ortodoxes orientales, que tienen 72 llibros y delles partes adicionales. Estos escritos reciben el nome de deuterocanónicos, o del segundu canon, yá que nun yeren aceutaos polos primeros cristianos.

Biblia
llibru relixosu, coleición d'obres lliteraries y objeto religioso (es)
Datos
Xéneru	lliteratura relixosa y llibru relixosu
Llingua de la obra	hebréu bíblicu, Araméu y Koiné
Llugar de la narración	Oriente Mediu
Formáu por	Vieyu Testamentu Nuevu Testamentu Biblia hebrea

Etimoloxía

La pallabra Biblia vien, a traviés del llatín biblĭa, de la expresión griega τὰ βιβλία τὰ ἅγια (ta biblía ta hágia; 'los llibros sagraos'), acuñada per primera vegada nel deuterocanónicu 1 Macabeos 12:9, u βιβλία ye'l plural de βιβλίον ('llibru'). Créyese qu'esti nome ñació como diminutivu del nome de la ciudá de Biblos (Βύβλος, Býblos), importante mercáu de papiros de la antigüedá.