Xingyiquan

El Xingyiquan (形意拳 , Pinyin = Xíng yì quán , Wade-Giles = Hsing I Ch'üan) ye ún de los principales estilos internos de les artes marciales chines. El términu traduzse aproximao como "Boxéu de la Forma y la Intención", o "Boxéu de la Forma y la Voluntá". L'estilu carauterízase polos sos movimientos agresivos y aparentemente lliniales y pola so potencia esplosiva. Nun hai una única organización que dirixa la enseñanza d'esti arte, que cunta amás con dellos estilos o escueles.

Xingyiquan (形意拳)
Tamién	Hsing I, Xing Yi, Hsing I Chuan, Xin Yi Liuhe Quan
País d'orixe	China
Fundador	Atribuyíu a Yue Fei, sieglu XII
Métodos téunicos	Arte internu (neijia)
Ancestros	N'alderique, quiciabes téuniques militares de llanza o Shaolin Kung Fu
Deporte olímpicu	Non

Un prauticante de xingyiquan emplega movimientos coordinaos pa xenerar españíos de potencia al envís d'achuquinar al oponente, atacando y defendiendo al empar. Les formes varien d'escuela a escuela, pero inclúin secuencies a mano vacía y versiones de les mesmes secuencies con una variedá d'armes. Estes secuencies básense na forma de movese y de lluchar de dellos animales. Los métodos d'entrenamientu permiten al estudiante progresar per mediu d'aumentar la dificultá nes secuencies formales, nel usu de los tiempos y na estratexa de combate.

Orixe

Anque nun se conoz l'orixe exautu del Xingyiquan, la lleenda atribúi'l so desarrollu al famosu xeneral chinu Yue Fei (1103–1142). Ensin embargu'l maestru y estudiosu Yang Jwing-Ming^[1] ye de la opinión de qu'hai aspeutos del Xingyi (como los estilos d'animales) que remonten los sos anicios al templu Shaolin na dinastía Liang (sieglu VI d.C.) y que, poro, Yue Fei lo que fizo foi sintetizar dellos principios preesistentes nel so propiu estilu de kung fu.

El primer escatafín documental sobro l'estilu alcuéntrase nes “Cróniques del Clan Ji”, de finales de la era Ming. A respeutive d'esti arte fálase aende de Ji Longfeng (1588-1662), tamién llamáu Ji Jike, al que munchos consideren el verdaderu creador del Xingyiquan. Les Cróniques describen el Xingyi como un arte basáu nos principios del combate con llanza, anque dicen que foi'l mesmu Ji Longfeng el responsable d'esta influyencia per aciu de la so gran maestría nel manexu d'esti arma (llamábenlu Shen Qiang, “Llanza Divina”).

Dempués la hestoria del Xingyiquan atapeció hasta Li Luoneng (tamién conocíu como Li Nengran), a finales del sieglu XIX. Foron Li Luoneng y los sos socesores —ente ellos Guo Yunshen, Li Cunyi, Zhang Zhaodong, Sun Lutang y Shang Yunxiang— los que popularizaron el Xingyiquan pel norte de China. Sun Lutang intercambió conocimientos con Fu Chen Sung, qu'a resultes diba a esparder la so escuela pel sur de China.

Anguaño les formes del Xingyiquan tán adautaes a les necesidaes de los modernos prauticantes del deporte competitivu del Wushu. Sicasí l'estilu vese raramente en competiciones por mor de que tolos prauticantes de wushu tienen que competir en delles pruebes obligatories, qu'arrequexen al xingyi a un llugar secundariu nos ambientes de wushu.

Carauterístiques

Sun Lutang en postura Santishi

El Xingyiquan carauterízase por ataques agresivos de choque y por una forma direuta de movese. La naturaleza llinial del Xingyi paez venir per un llau de los sos oríxenes militares y, per otru, de la influyencia de la llanza que se dicía taba nos sos anicios. A pesar de la so traza dura y angular, cautivar la fuercia interna o qi "suave" ye esencial pa consiguir potencia nel Xingyiquan.

El propósitu del prauticante de Xingyi ye arreblagar hasta l'oponente y trespasalu potentemente con un únicu puxu (como usando una llanza). Esto llógrase coordinando tol cuerpu como una unidá y concentrándose dafechu nel propiu qi.

La eficiencia y la economía de movimientos son les cualidaes d'un estilista de Xingyiquan, y la so filosofía de llucha direuta sofita l'ataque y defensa simultáneos. Hai poques pataes, quitando los golpes de pie perbaxos (qu'eviten los desequilibrios qu'acompañen a les pataes altes) y dalgunes pataes a nivel mediu, y les téuniques apréciense más pola so eficacia que pol so valir estéticu.

El Xingyiquan prefier una postura alta llamada Santishi, lliteralmente "poder de tres cuerpos," por cómo la postura caltién la cabeza, troncu y pies nel mesmu planu vertical. Un dichu común del Xingyiquan ye: “les manes nun abandonen al corazón, y los coldos nun abandonen a les costielles.”

L'usu del Santishi como postura y métodu d'entrenamientu principales anicia na rama de Li Luoneng. Rames más tempranes, como l'estilu de la familia Dai, nun usen el Santishi como postura principal nin como métodu d'entrenamientu.

Formes de los Cinco Elementos

El Xingyiquan emplega los clásicos cinco elementos de la filosofía china pa representar metafóricamente cinco diferentes estaos de combate. Tamién llamaos los "Cinco Puños" o les "Cinco Fases", los cinco elementos rellaciónense cola cosmoloxía Taoísta, anque los nomes nun correspuenden lliteralmente colos términos cosmolóxicos.

Los prauticantes de Xingyiquan usen los cinco elementos como un marcu interpretativu pa reaicionar y responder a los ataques. Esto sigue la teoría de los cinco elementos, una fórmula de combate xeneral qu'asume polo menos tres resultaos d'un combate: el constructivu, el neutral, y el destructivu. Los estudiantes entrenen pa reaicionar énte téuniques específiques y empara executales de tal forma que van crear arrémente un ciclu basáu nes interaiciones constructives, neutrales y destructives de la teoría de los cinco elementos. Ónde apuntar, ónde golpiar y con qué téunica —y cómo esos movimientos funcionen defensivamente— ta determinao pol puntu del ciclu nel que creyan que tán.

Caún de los elementos tien aplicaciones estremaes que permiten usalu pa defender escontra tolos elementos (incluyendo'l mesmu), polo que cualesquier conxuntu de secuencies ye dafechamente arbitrariu, masque'l ciclu destructivu ye davezu aprendíu a los principiantes como si fuera más fácil de visualizar y tuviera aplicaciones más cencielles.

Delles escueles enseñen los cinco elementos primero de los doce animales por ser más fáciles y curtios d'aprender

Los Cinco Elementos del Xingyiquan

	Chinu	Pinyin
Fender	劈	Pī	Metal	Como una bruesa que corta llevantándose y cayendo.
Abarrenar	鑽	Zuān	Agua	Abarrenar horizontalmente como un guéiser.
Achaplar	崩	Bēng	Madera	Rabasera constante de fleches.
Machucar	炮	Pào	Fueu	Arreventar pa fuera como un cañón bloquiáu.
Cruciar	橫	Héng	Tierra	Cruciar pela llinia d'ataque al tornar.

Quiciabes nun ye acionao que los nomes usaos pa los elementos s'empleguen como nomes fundamentales p'aplicaciones d'enerxía o jìn (勁), darréu que pue ser confuso describir el "heng jin conteníu nel pi quan". Los jìn a los que se refieren los nomes de los cinco elementos nun son los únicos, sinón qu'hai munchos otros.

Formes d'animales

El Xingyiquan básase en doce formes d'animales estremaes (形; pinyin: xíng). Presentes en tolos estilos rexonales y familiares, éstes remeden les téuniques y táutiques del animal correspondiente más que solo los sos movimientos físicos. Munches escueles de Xingyi tienen solamente un númberu pequeñu de movimientos pa cada animal, anque delles aprienden secuencies estenses de movimientos. Una y bona que les formes d'animales son enseñaes, al estudiante apriénden-y davezu una forma coneutada con un animal (shi'er xing lianhuan), que combina tolos animales enseñaos xuntos nuna secuencia. Dellos estilos tienen formes más llargues, o múltiples, p'animales en concreto, como les Formes d'Ocho Tigres Huxing bashi.

Los diez animales comunes

	Chinu	Pinyin
Osu	熊	Xióng	En Xingyi, "combinar l'osu y l'águila" significa que les téuniques del Osu y del Águila úsense davezu en xunto. Hai un páxaru llamáu l'"Águila Osu" (Nisaetus Nipalensis) que recueye les carauterístiques de dambes formes.
Águila	鷹	Yīng
Culiebra	蛇	Shé	Inclúi los estilos Constrictor y Víbora.
Tigre	虎	Hǔ	Carauterízase por acometer con ataques destructivos cola mano abierta remedando'l blincu d'un tigre.
Dragón	龍	Lóng	L'únicu animal mitolóxicu enseñáu (resalvando los sistemes familiares nos que'l fénix ye ún de los 12 animales). En dellos llinaxes prautícase al marxe del tigre, porque dicen que choquen.
Pitu	鷄	Jī	Remeda'l movimientu d'espicotiar d'un pitu. Tamién remeda l'estilu de combate rápidu y agresivu del gallu.
Caballu	馬	Mǎ	Combinación de Metal y un movimientu de manes qu'imita l'aición d'un caballu erguiéndose. Ensin embargu execútase con tensión.
Andolina	燕	Yàn	Sigue los movimientos rápidos y debalaos de l'andolina alternando la posición y arrodiando al enemigu con un movimientu de pies fuerte pero rápidu. Pue referise tamién a una ave conocida en delles partes como “calamón” (porphyrio porphyrio).
Azor	鷂	Yào	Pue ser tamién el gavilán, anque la pallabra más común pa ésti ye Zhān (鸇), anguaño en desusu. La pallabra china pa “azor” val tanto pa azor como pa gavilán. Hai que dicir qu'en dellos llinaxes esti animal refierse tanto al gallu montés o al faisán, como al fénix.
Monu	猴	Hóu	Trabáyase con un movimientu llixeru y sueltu, golpes cenciellos combinaos con paraes y distancies engañoses.

Otros animales que pueden tar presentes nun llinax concretu

	Chinu	Pinyin
Grulla	鶴	Hè
Cocodrilu	鼍	Tuó	Refierse más bien al caimán del ríu Yangtsé, o delles veces a un inseutu zapateru o a una llagartesa d'agua. Los movimientos del caimán del ríu Yangtsé compárense a los d'un gochu cruciáu con un dragón.
Papamosques	鳥台		Trátase d'un papamosques nativu d'Asia. Como ye un animal raru, igual hai que lu tornar a avestruz, palombu, ferre o inclusive fénix.
Tortuga	龜	Guī	Representa a la tortuga mordedora, qu'usa rápidos movimientos de cabeza pa pillar pexes. Delles escueles apriéndenla xunto col Tuó (cocodrilu), por consideralos el mesmu animal.
Avestruz	鴕	Tuó	Ye l'avestruz chinu. Tien pasos asemeyaos a los de Fueu y Tigre, con arrodeos contra-direicionales y “uppercuts” dobles.

Armes

Tradicionalmente'l xingyiquan foi un arte d'armes. Los estudiantes estudien primero cola llanza, pa pasar adulces a armes más curties y, col tiempu, a la llucha a mano vacía. El xingyiquan sorraya una estrecha rellación ente los movimientos de les téuniques con y ensin armes. Esta superposición téunica tien el propósitu de producir una mayor eficiencia nel deprendimientu.

Armes comunes

• Llanza (Qiang)
• Espada reuta (Jian)
• Sable (Dao)
• Sable grande (Zhanmadao, usáu pola infantería contra enemigos a caballu)
• Palu llargu (Gun)
• Palu curtiu (con un llargor máximu de dos palmos, les téuniques con esti arma pudieron surdir de les que se facíen col estil rotu d'una llanza)
• Aguyes (enforma asemeyaes a estiletes que se garren pel centru, debíen usase nel campu batalla sobre too pa finar a un oponente cayíu a traviés de puntos febles n'armadura)
• Fuyue (alabardes d'estremaos tipos)
• Espada d'espolón de pitu. Esti arma creóla supuestamente Ji Longfeng, convirtiéndose nel arma especial del estilu.

Hai mui bien delles armes. La idea ye qu'un lluchador espertu de Xingyi seya quien a remanar cuasi cualesquier arma ensin que-y importe'l so llargor, pesu o forma.