Malí, oficialmente República de Malí ye un país d'África. Llenda al norte con Arxelia, al este con Níxer, al oeste con Mauritania y Senegal, y al sur con Costa de Marfil, Guinea y Burkina Fasu. Ye, colos sos 1.240.192 km², l'octavu estáu más grande de tol continente, y tien una población de 19,1 millones d'habitantes; el 67% d'ellos tien menos de 25 años (2017).La so capital ye Bamaku. L'estáu sodivídese alministrativamente n'ocho rexones, y tien un clima estremáu nes sos diverses fasteres: la más septentrional asítiase en plenu desiertu d'El Sáḥara, y la meridional, na que vive la mayoría la so población, ocúpala la sabana sudanesa. El país ye travesáu polos ríos Níxer y Senegal. La economía del país céntrase na agricultura y la minería. Ún de los principales recursos naturales del país ye l'oru; Malí ye'l tercer mayor productor d'esti mineral de tol continente. Tamién ye importante la esportación de sal.