La Operación Orchard foi un ataque aereu d'Israel sobre un oxetivu conocíu polos sirios col nome clave d'Al-Kibar, asitiáu na rexón de Dayr az-Zawr, en Siria, lleváu a cabu xustu dempués de la medianueche del 6 de setiembre de 2007. Acordies cola información que se dio a conocer nos diversos medios de comunicación, l'ataque foi executáu pol 69º Escuadrón de F-15I Strike Eagle de la Fuercia Aérea Israelina, amás d'aviones F-16 Fighting Falcon y una aeronave militar d'intelixencia electrónica, con un total d'ocho aeronaves. Los aviones de combate taben forníos con misiles Aire-Tierra AGM-65 Maverick, bombes de 227 quilos y tanques esternos de combustible. Un informe indicó coles mesmes qu'un comandu de Shaldag, que formaben parte de la Fuercia Aérea Israelina, llegó al llugar el día previu pa señalizar los oxetivos vía láser.