El subcontinente indiu ye la rexón xeográfica qu'abarca la mayor parte de la India histórica, anguaño estremada ente los estaos d'India, Paquistán, Bangladex, Nepal y Bután. Por razones culturales y xeográfiques, considérase tamién parte del subcontinente los estaos insulares de Sri Lanka y Maldives. Toos estos países formen parte de l'Asociación Sudasiática pa la Cooperación Rexonal. El subcontinente indiu foi conocíu mientres sieglos como l'Indostán y ye equivalente al territoriu qu'hasta la desapaición del Raj británicu en 1947 yera conocíu como la “India británica”. En total, la superficie del subcontinente indiu xube a unos 4 480 000 km².