![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/5/5c/View_from_the_Window_at_Le_Gras%252C_Joseph_Nic%25C3%25A9phore_Ni%25C3%25A9pce.jpg/640px-View_from_the_Window_at_Le_Gras%252C_Joseph_Nic%25C3%25A9phore_Ni%25C3%25A9pce.jpg&w=640&q=50)
Schwarz-Weiß-Photographie
From Wikipedia, the free encyclopedia
De easchtn Photos iabahapt warn schwarz-weiß. Und obwois eingle scho lang vaaltet is und in fui Bereiche vo da Farb-Photographie obglöst worn is, erfreit se de Schwarz-Weiß-Photographie oibei no na hohn Beliabtheit.
Der Artikl is im Dialekt Obaboarisch gschriem worn. |
![Thumb image](http://upload.wikimedia.org/wikipedia/commons/thumb/5/5c/View_from_the_Window_at_Le_Gras%2C_Joseph_Nic%C3%A9phore_Ni%C3%A9pce.jpg/640px-View_from_the_Window_at_Le_Gras%2C_Joseph_Nic%C3%A9phore_Ni%C3%A9pce.jpg)
S' Bsundane an da Schwarz-Weiß-Photographie is de Abwesnheit vo Farb. In vui Fälln werd des ois Nachteil gseng, desweng war a ollawei as Bemühn groß, de Farbphotographie vorwärts zum bringa. Aba grod dadurch, das as Schwarz-Weiß-Buidl ned da normaln Sichtweis daspricht hods fui Spuiraum fia künstlerische Gstaltung. Wei da Betrachter ned vo bunte Farbn obglenkt werd richt se da Blick mehra auf Formen, Muster und Kontraste, auf de graphische Wirkung vo am Motiv. Fia a ansprechends Schwarz-Weiß-Buidl muaß da Photograph aba a an richtign Blick hom, wei vui Motive, de in echt, oiso in Farb recht schee han, schaung in Schwarz-Weiß recht langweilig aus. Auf da andan Seitn gibts a gnua Motiv, de eascht durch Schwarz-Weiß an Wirkung gwinna.
In da moderna Photographie wern Schwarz-Weiß-Buidl gern ois absichtlicher Gegnpol zua Flut vo bunte Buidl gseng. Dazua passt a, daß oa wichtigs Gestaltungsmittl vo da Schwarz-Weiß-Photographie, nämli de Körnung, beim Rest vo da Photographie ois Qualitätsmangl ogseng werd.
S' Entwickln vo Fuim und a vo fertige Buidln is in da Schwarz-Weiß-Photographie mit recht gringem Aufwand an Chemikalien und Grätn mäglich. A do hod da Photograph an Haffa Spuiraum fia kreative Experimente, wei ma mid da Wahl vo de Chemikalien, am Fuim, am Papier und durch fui andane Tricks as fertige Buidl stark beeinflußn ko. Desweng hod se a nia a Standard-Prozess durchgsetzt, im Gengsatz zua Farbphotographie, wo se oa gnormter Prozess fia olle Fuim entwicklt hod. Obwoi oiso as Herstelln vo Schwarz-Weiß-Buidl technisch fui oafacha is, is de Massnfertigung vo Farb-Buidl trotzdem billiger.