Астэрас Трыпаліс

«Астэ́рас» (па-грэцку: Αστέρας) — грэцкі футбольны клюб з гораду Трыпалісу. Заснаваны ў 1931 годзе.

Астэрас
Поўная назва	па-грэцку: Α.Γ.Σ. Αστέρας Τρίπολης Ποδοσφαιρική Ανώνυμη Εταιρεία
Заснаваны	26 сакавіка 1931
Горад	Трыпаліс, Грэцыя
Стадыён	Калякатроніс Умяшчальнасьць: 7616
Прэзыдэнт	Ёргас Барабіляс[d]
Галоўны трэнэр	Савас Пантэлідыс[d]
Чэмпіянат	Супэрліга
· 2024—2025	6 месца
Галерэя здымкаў у Вікісховішчы asterastripolis.gr (грэцк.)

Гісторыя

«Астэрас» быў заснаваны 26 сакавіка 1931 году ў раёне ля чыгуначнай станцыі Трыпаліс і адразу ж атрымаў афіцыйнае прызнаньне. Аднак першы час клюб заставаўся неактыўным, і цягам 1932 году ўсе футбольныя клюбы ў горадзе часова прыпынілі сваю дзейнасьць. У той жа час Мінас Цаўдарыс заснаваў іншы футбольны клюб пад назовам «Керамікас» у гонар свайго роднага гораду^[1]. Не зважаючы на ягоныя намаганьні, «Керамікас» ня здолеў набыць афіцыйны статус, таму ў 1938 годзе ён пастанавіў накіраваць усіх гульцоў свайго клюбу ў склад «Астэрасу»^[1]. Гэта азначала адраджэньне клюбу. У 1939—1940 гадах «Астэрас» браў удзел у першым розыгрышы рэгіянальнай Аркадзкай лігі. У наступным нямецкая акупацыя Грэцыі спыніла ўсе спаборніцтвы, у выніку чаго клюб зноў быў распушчаны.

Заўзятары «Астэрасу» сьвяткуюць перамогу ў кубкавым матчы.

Па Другой сусьветнай вайне «Астэрас» быў рэфармаваны пад назовам «Нэас Астэрас»^[1]. У наступным каманда здабыла пяць тытулаў запар у Аркадзкай лізе з 1957 па 1962 гады. Два сэзоны з 1961 па 1963 гадоў дружына спаборнічала ў другім нацыянальным дывізіёне, стаўшы тым самым першай камандай з Трыпалісу, якая калі-небудзь брала ўдзел у такім высокім дывізіёне^[1]. Улетку 1963 году «Астэрас» аб’яднаўся з «Арыс-Атромітасам», і новая каманда атрымала назву «Атлітыкас Аміляс Трыпаліс» ці скарочана ААТ. Новы клюб працягваў функцыянаваць да 1968 году, пасьля чаго быў зноў зьліквідаваны, а пасьля аб’яднаны з «Аркадыкосам».

У 1978 годзе «Астэрас» зноў паўстаў як самастойны клюб^[1]. Каманда змагалася ў рэгіянальных дывізіёнах ажно да 2003 году. У 2001 годзе клюб уступіў у новую эру і правёў выдатную сэрыю выступаў пад кіраўніцтвам Дымітрыса Бакаса і Яніса Каймэнакіса. Дружына заставалася непераможная на хатняй арэне пяць гадоў, то бок з 2001 па лістапад 2006 году. Тым часам «Астэрас» здолеў узьняцца на чатыры дывізіёны вышэй, атрымаўшы павышэньне ў Супэрлігу як чэмпіён другога дывізіёну 12 траўня 2007 году. «Астэрас» зрабіў уражлівы старт у сваім пачатковым сэзоне ў эліце. Першай перамогай у найвышэйшым дывізіёне скончыўся матч супраць «Панатынаікосу», а першым гасьцявым посьпехам скончыўся матч супраць ОФІ на Крыце. Сэзон адзначыўся некалькімі выдатнымі сустрэчамі, а самай запамінальнай стала хатняя перамога зь лікам 1:0 над чэмпіёнам «Алімпіякосам». У свой дэбютны сэзон трыпальцы перамаглі таксама АЕК зь лікам 2:1 і ПАОК зь лікам 2:0.