Грашовы перавод

Грашовы перавод — спосаб безнаяўных разьлікаў праз банкі і прадпрыемствы сувязі. Пры адсутнасьці банкаў аплочваецца прадпрыемствамі сувязі наяўнымі грашыма на імя фізычнай асобы. Юрыдычнымі асобамі ажыцьцяўляецца пры дапамозе плацежных даручэньняў. Пры загадзя вызначаным прызначэньні сумы называецца мэтавым і мае месца між юрыдычнымі асобамі шляхам выплаты з асобнага рахунку. За выкананьне сплочваецца камісійны збор^[1]. Віды: 1) унутрыкраёвыя (унутраныя; «Грошы-скараходы», «Стрыж», «Хуткія грошы» і «Экспрэс-перавод»), 2) замежныя (міжнародныя; «Вэстэрн Юніён», «Контэкт», «Мігом» і «Юністрым»)^[2].

Адпраўленьне

Крокі:

1. выбар спосабу і банка;
2. запаўненьне заявы ў банку;
3. падача зьвестак аб атрымальніку, кошце тавара і месцапрызначэньні плацяжу;
4. паказ адказнаму выканаўцу банка пасьведчаньня асобы (пашпарт);
5. аплата сумы перавода і камісійнага збора;
6. атрыманьне ад адказнага выканаўцы банка кантрольнага нумара перавода;
7. паведамленьне атрымальніку кантрольнага нумара і спосабу перавода^[3].