Другая менская кальцавая аўтамабільная дарога

Друга́я ме́нская кальцава́я аўтамабі́льная дарога (МКАД-2), аўтамагістраль М14^[1] — аўтамабільная магістраль вакол Менску^[2].

М14
Другая менская кальцавая аўтамабільная дарога
МКАД-2
Краіна	Беларусь
Статус	рэспубліканская
Даўжыня	160 км
Дата адкрыцьця	22 сьнежня 2016

Дарога пабудаваная часткова па новым напрамку, а таксама з выкарыстаньнем дзейных участкаў аўтадарог. Агульная яе працягласьць складае каля 160 км.

Гісторыя

У 2011 годзе пачалі будоўлю 2-й менскай аўтадарогі, але празь фінансавы крызіс у Беларусі 2011 году яе прыпынілі. У сакавіку 2014 году ўзьвядзеньне 2-й МКАД аднавілі. У ліпені 2014 году «Банк разьвіцьця Беларусі» вылучыў Міністэрству транспарту і камунікацыяў Беларусі пазыку на 559 млн рублёў (54,5 млн даляраў) для будаўніцтва 2-й МКАД^[3]. 3 верасьня 2014 году падчас наведваньня будаўнічай пляцоўкі на адным з участкаў ў Менскім раёне, дзе пройдзе другая кальцавая аўтадарога, Прэзыдэнт Беларусі Аляксандар Лукашэнка даручыў увесьці ў строй МКАД-2 да 1 студзеня 2017 году^[4].

Будаўніцтва другой кальцавой аўтадарогі вакол Менску плянавалася ажыцьцявіць у два этапы. На першым этапе было заплянаванае будаўніцтва ўчастку ад аўтадарогі М3 Менск — Віцебск (раён Астрашыцкага Гарадку) да аўтадарогі М6 Менск — Горадня (раён Аксакаўшчыны) працягласьцю каля 46,1 км. На другім этапе заплянаванае будаўніцтва ўчастку ад аўтадарогі М6 Менск — Горадня — мяжа Польшчы да аўтадарогі М1/E30 Берасьце — Менск — мяжа Расеі працягласьцю 42 км^[5].

У складзе МКАД-2 меркавалася выкарыстаць участкі аўтадарог:

• М1/E30 Берасьце — Менск — мяжа Расеі (48 км),
• М2 Менск — Нацыянальны аэрапорт Менск,
• Р80 Слабада — Паперня.

6 кастрычніка 2015 году Прэзыдэнт Беларусі Аляксандар Лукашэнка адкрыў участак у 23,7 км другой менскай кальцавой аўтадарогі^[6]. 16 сьнежня 2015 году адкрыты рух на ўчастку ад дарогі Р28 Менск — Маладзечна — Нарач да аўтатрасы М6 Менск — Горадня^[7]. Такім чынам стаў даступным ўчастак каля 47 км, які злучыў віцебскую і гарадзенскую шашу.

22 сьнежня 2016 году адкрыўся рух па завершанай Другой менскай кальцавой аўтадарозе^[8].

Парамэтры аўтадарогі

• Даўжыня — каля 160 км.
• Шырыня — 22,7 м.
• Чатыры паласы (па 2 у кожным напрамку)
• Разьдзяляльная паласа — 2,7 м.
• Разьліковая хуткасьць — 120 км/г.
• Інтэнсіўнасьць руху 11,3 — 24,3 тыс. аўтамабіляў у суткі.
• Набліжаныя да забудовы ўчасткі дарогі будуць абсталяваныя шумаахоўнымі экранамі.